मुख्यमंत्री न विभागु थैं दीं 2025 तक का विकास कामु क लक्ष्य थैं पूर करण क निर्देश

देरादूण। मुख्यमंत्री धामी न आज सचिवालय मा सशक्त उत्तराखण्ड / 25 क जरिया विभागौं क कामु क समीक्षा बैठक कायी अर निर्देश दीं कि साल 2025 तक का लक्ष्य मा जु बि काम कर्यें जाणा छन उथैं पूरू करणा मा बगत कु खास ध्यान दियें ज्या। मुख्यमंत्री न बोलि कि साल 2025 तक उत्तराखण्ड थैं देस मा अग्वानया (अग्रणी) प्रदेसा बणौंणा खूंणि विभागु न जु लक्ष्य तय कर्यां छन, वै फर अबि तक कतगा काम ह्वै अर भवैष्य क काम मा तेजी ल्याणा खूंणि नियमित समीक्षा कर्यें ज्यां।

मुख्यमंत्री न बोलि कि प्रदेस मा पर्यटन, कृषि, उद्यान, उद्योग क तोक मा अबि बौत काम च। उन्न बोलि यु तोक मा कम बगता क कार्ययोजना बण्यें कि साल 2023 तक औरि क्या अच्छु कर्यें जै सकदु, यीं दिसा मा तेजी से काम कर्यें जाण चैंद। मुख्यमंत्री न अधिकारियों तैं निर्देश दीं कि प्रदेसा घर्या उत्पादु थैं अगनै बढ़ौंणा खूंणि औरि कोसिस कर्यें ज्यां।

बैठक मा मुख्य सचिव डॉ. एस.एस. संधु, अपर मुख्य सचिव श्रीमती राधा रतूड़ी, आनन्द बर्द्धन, सचिव आर मीनाक्षी सुन्दरम, शैलेश बगौली, डॉ. पंकज कुमार पाण्डेय, विजय कुमार यादव, एस.एन. पाण्डेय, महानिदेशक यूकॉस्ट प्रो. दुर्गेश पंत छायी।