मुख्यमंत्री जी बडु़ जिकुडु़ दिखाणा खूंणि धन्यवाद!

ब्याळी कु दिन उत्तराखण्ड क दिवंगत पत्रकारू क कुटुमदारि खूूंणि राहत लेकैकि आयीं। उत्तराखण्ड का इन्ना 19 पत्रकारू क कुटुमदारि थैं राज्य सरकारळ 5 – 5 लाख रूप्या देंण मंजूर कैरि द्यायी। ऐ काम थैं पूरू करणा क श्रेय मुख्यमंत्री थैं जांद। उत्तराखण्ड बणणा का बाद यु पैळु बार च कि जब इतगा जादा रूपया दिवंगत पत्रकारों क कुटुमदारि थैं देंण खूंणि मंजूर ह्वै । ई बात से साफ ह्वै जादा कि मुख्यमंत्री तीरथ सिहं रावत पत्रकार क भलैय का वास्ता मयाळु छन।

बतै दियां कि पत्रकारों थैं मदत देंणा खूंणि राज्य सूचना एवं लोकसम्पर्क विभाग मा पत्रकार कल्याण कोष पैळि बटि च। पत्रकार कल्याण कोष समिति मा पास हूंण का बाद मुख्यमंत्री पत्रकारू अर ऊंकी कुटुमदारि थैं हूंण वळी मदत थैं मंजूरी दिंदन।

उत्तराखण्ड मा समिति का बैठक द्वी साळ बटि नि ह्वै छायी। जै कारण से दिवंगत हुय्यां पत्रकारू थैं कोष कु कुईं भि फैदा नि हूंण छायी। दिवंगत दीप जोशी अर पुरुषोत्तम असनोड़ा जन 18 पत्रकारू थैं ईं दून्या बटि ज्यां एक साळ ह्वैग्यी पर अबि तक ऊंकी कुटुमदरि थैं पत्रकार कल्याण कोष बटि कूईं मदत नि मिळि छायीं।

मुख्यमंत्री तीरथ सिंह रावतन ईं बात कु जाणकारी ल्यायी अर अपरैळ का मैना मा पत्रकार कल्याण कोष समिति मा चार सदस्य थैं मनोनीति कायी। जैका बाद 1 जून खूंणि समितिळ बैठक कायी। बैठक मा 18 पत्रकारू का मामळा पर विचार कैरिक ऊंकी कुटुमदारि थैं 5-5 लाख रुप्यों देंणा क बावत मुख्यमंत्री से मंजूरी मांगी। मुख्यमंत्री तीरथ सिंह रावतन झ्ट अपणि मंजूरी दे द्यायी।

उत्तराखण्ड मा पत्रकारू क कल्याण खूंणि सरकारि सिस्टमळ जदगा तेजी से काम कायी सैद उत्तराखण्ड मा पैळु उदारण होळु। या मा सरकार क जदगा भि गुणगान करै ज्याँ वो कम च।

यूं पैळु मौका नि च जब मुख्यमंत्री तीरथ सिंह रावतन पत्रकार क भलैय का वास्ता काम कायी। यां से पैळि उन्न पत्रकारू अर ऊंकी टुकुमदारि खूंणि कोविड टीका लगाणा क अळग से व्यवस्था कायी। ये मामळा मा सूचना महानिदेशक रणवीर सिंह चैहान क भि जतगा सराहना करै ज्यां उतगा कम च।

साभार गढ़वाळै धै