7708 करोड़ रूप्यौं से होलु, टिहरी झील विकास परियोजना कु काम

देरादूण। पर्यटन, धर्मस्व एवं संस्कृति मंत्री सतपाल महाराज न बोलि कि 7708 करोड रूप्यौं से टिरी झील विकास परियोजना म विकास काम कर्यें जाला। उन्न बोलि उत्तराखंड पर्यटन विकास परिषद यां खूंणि डीपीआर त्यार करणु च। यां से पर्यटन तैं बढ़ावा मिललु, अर टिरी जिला क 173 गौं तैं फैदा मिललु।

पर्यटन मंत्री न महाराजन न पर्यटन अर संस्कृति विभाग क् कामु क समीक्षा क दगड़ा-दगड़ि 7708 करोड़ रूप्यौं लागत से टिरी झील क चर्या तरफि रिंगरोड खूंणि फिजीबिलिटी, संरेखण, सर्वेक्षण, भूमि अधिग्रहण पर अबि तक हूंयी प्रगति क समीक्षा बि कायी। उन्न बोलि कि टिरी झीला 42 किलोमीटर क्षेत्रफल तैं पर्यटन खूंणि विकसित कर्यें जालु। या से रूजगार कु मौका मिललु। उन्न बोलि रिंगरोड़ बणण से देस अर दुन्या पर्यटकु तैं टिरी पौंछण मा असानी होलि अर झील म सर्या साल साहसिक खेलु उर्यौंणा कु मौका मिललु। महाराजन बोलि कि डोगरा चांटी पुळ तकाकु तोक तैं विकसित करणा खूंणि विभाग डीपीआर त्यार करणु च।