सशक्त उत्तराखण्ड @ 25 क लक्ष्य, मुख्यमंत्री न दीं अधिकारियों तैं निर्देश

देरादूण। मुख्यमंत्री धामी न आज सचिवालय मा सशक्त उत्तराखण्ड @ 25 क लक्ष्यौं तैं हासिल करणा खूंणि वन विभाग अर लोक निर्माण विभाग क त्यार करि अल्प, मध्य अर दीर्घकालिक रोडमैप क समीक्षा कायी।

वन विभाग क समीक्षा मा मुख्यमंत्री न अधिकारियौं तैं निर्देश दीं कि कैम्पा क जरिया हूंण वला कामु मा तेजी कर्यें ज्यां। अर यु तय कर्यें ज्यां कि कैम्पा क जरिया मिलणा पैंसौं कु बगत फर अर सै तरीका से उपयोग हूयां। मुख्यमंत्री न वन विभागा अधिकारियौं तैं निर्देश दी कि हरेला त्योवार मा जादा से जादा डाळा लग्यें ज्यां। उन्न बोलि फळ अर औषधीय डाळौं लगौंणा फर खास ध्यान दियें ज्यां अर ऐ काम मा सामाजिक संगठन अर ळोगु क मदत ल्यें ज्यां।

लोक निर्माण विभागा बैठक मा मुख्यमंत्री न अधिकारियौं तैं निर्देश दीं बल प्रदेस मा पर्यटन क तोक मा हूंणा विकास, मन्दिर माला मिशन क जरिया हूंणा कामु व विकास अर भवैष्य क सम्भावना तैं देखिक निर्माण अर विस्तार क दिसा मा काम कर्यें ज्यां। मुख्यमंत्री न निर्देश दीं की सड़क बणौंणा क दगड़ मा सड़कि बटि पाणि निकलणा क बन्दबस्त बि कर्यें ज्यां अर सड़क बणौंणा मा गुणवत्ता कु खास ध्यान दियें ज्यां। मुख्यमंत्री न बोलि कि यु तय कर्यें ज्यां कि सड़क कटणा क बगत मा क्वीं पाणि क धारा अर नौळा तैं नुकसान नी हूंण चैंद।

मुख्यमंत्री न बोलि कि सब पुराणा पुळु कु सर्वे कर्यें ज्यां अर सड़क बणौंणा मा वन विभाग जमीना जु बि मामला छन वैकु समाधान खूंणि खळाखळ काम कर्यें ज्यां। उन्न बोलि कि सचिव पीडब्लूडी तैं निर्देश दीं कि विभागा क तरफ बटि भारत सरकार तैं जु बि प्रस्ताव भेज्यें जाणि वु तैं झट भेज्यें ज्यां।

बैठक मा वन मंत्री सुबोध उनियाल , अपर मुख्य सचिव श्रीमती राधा रतूड़ी, सचिव डॉ.पंकज कुमार, प्रमुख वन संरक्षक (हॉफ) अनूप मलिक, अपर सचिव विजय कुमार जोगदाण्डे, लोक निर्माण अर वन विभाग के अधिकारी छायीं।