कैबिनेट बैठक मा 15 प्रस्तावु पर लगिग्यें ठप्पा

देरादूण। मुख्यमंत्री पुष्कर सिंह धामी के अध्यक्षता मा हूवीं कैबिनेट बैठक मा 15 प्रस्तावु फर मंत्री मण्डल न अपणु ठप्पा लग्यें दें।

मंत्री मण्डल न बैठक मा जौ प्रस्तावु पर ठप्पा लग्यें ऊंकी जाणाकारी क बारा मा मुख्य सचिव एस. एस. संधु न बतै बल जसपुर तहसील क 19 गौ थैं हट्यें की काशीपुर तहसील मा ज्वड़नु क फैसळा ल्यें ग्यें।

परिवहन विभाग के सेवा नियमावली थैं प्रख्यापित करणा के भि फैसळा ल्यें ग्यें।

जैमा स्कुळय नौन्याळु थैं स्वास्थ्य अर स्वच्छता क बारा मा जाणकारी देंणा खूंणि उत्तराखण्ड बोर्ड क कक्षा 1 से 12 तक कु पाठ्यक्रम मा सामिल कर्यें जाणा कु फैसळों पर कैबिनेट न अपड़ि मंजूरी दे द्यायी।

केदारनाथ धाम मा हूंणा निर्माण कामु मा अब मकान थैं द्वी मंजिलु बण्यें जै सकदु। दगड़ा दगड़ि निमार्ण क काम खूंणि कंसल्टेंसी न जादा भुरत्यों क मांग कै छायीं, जै थैं मंत्री मण्डल न अपड़ि मंजूर कु ठप्पा लग्यें दे।

526 करोड़ रुप्यों कु जायका प्रोजेक्ट थैं अगनै बणौंणा खूंणि भर्ती करणा खूंणि मंत्री मण्डलन मंजूरी दे।
राजस्व विभाग मा सात अधिकारियों थैं पदोन्नति करणा क सुप्रीम कोर्ट कु आदेश कु पालन कैरिक मंत्रीमण्डन अपणि मंजूरी दे।

त वखी रियल एस्टेट डेवलपर मा बैचण अर खरीदण वलों क बीच मा जू चिट्ठी हूंद, वै थैं भारत सरकार कु त्यार फॉर्मेट मा प्रदेस मा लागू कर्यंे जालु।

परिवहन विभाग मा 24 लोगु क नौकरी लग्यीं च लेकिन राजस्व कम हूंण से अभि ऊंकी भर्ति विभाग मा नि ह्वै छायीं, इन्न मा कैबिनेट मा यू फैसळा लिये ग्यें बल अब 24 जनों थैं विभाग मा भर्ति क चिट्ठी दियें जाली।

रेलवे विभाग न एक आदेश च जैमा रेलवे टैªक क नजीक सड़क बण्यें जाणा खूंणि मंजूरी प्रदेस सरकार बटि लिंणा क बात छायी। जै फर अब उत्तराखण्ड सरकारन अपडु भि ठप्पा लग्यें दे।

उच्च शिक्षा मा छात्रवृत्ति योजना मा कौशल निधि दियें जन्दिन, वैमा जू नौना 1 साल तक यू पैसा नि लिन्दु, त वु रुप्यौं थैं स्कुळक विकास मा खर्च कर्यें जालु।

कैबिनेट मा यू भि फैसळा ह्वै बल जू 1662 कर्मचारी जौ थैं कोविड मा नौकरि दीयें ग्यें छायी। उन सब्यौं कर्मचारियों थैं क नौकरी थैं 6 मैना खूंणि अगने बण्यें जाली।

अगळि 5 सालु मा इकोनॉनी थैं कैन कैकि बणि सकदन या खूंणि उत्तराखण्ड सरकार जणगुरू क दगड़ मा सलाह कर्यें जाली।

सितारगंज चीनी मिल पीपीपी मोड मा दियें जाली। जैमा सिक्योरिटी मनी थैं 5 फीसदी कम कैकि 2 फीसदी कर्यें ग्यें।