जंणगुरु डॉक्टर 65 साल तक द्याला अपणि सेवा
प्रदेस सरकारन विशेषज्ञ डॉक्टरौं तैं नैं सालै इनाम द्यायी। विशेषज्ञ डाक्टरु तैं सेवा कु लाभ देकैकि ऊंकी सेवानिवृत्ति की उमर बढ़ये ग्यायी। जंणगुरु (विशेषज्ञ) डॉक्टरु अब 65 साल तक अपणि सेवा द्याला। पैलि वु 60 साल तक नौकरि करदा छायीं।
स्वास्थ्य सचिव डॉ. आर रोजश कुमारन बोलि कि उमरम पांच सालै छुट कु आदेश जारी ह्वेग्ये। यां से प्रदेसा 550 डॉक्टरु तैं फैदा होलु। सरकार कु ये फैसलन प्रदेसम जंणगुरु डाक्टरौं की कमी दूर ह्वे जाली अर दूर गौं कु तोकम रैंण वला लोगु तैं यांकु फैदा मिललु।
स्वास्थ्य सचिव न बतै कि प्रदेस सरकार जनता तैं अच्छी से अच्छी स्वास्थ्य सेवा देंणा वास्ता लगी च अर स्वास्थ्य सेवाओं म तेजी से सुधार करे जाणु च। इल्लै जंणगुरु डॉक्टरों के सेवम पांच सालै विस्तार करणा कु फैसला लिये ग्यायी। उन्न बोलि सेवा विस्तार उ डॉक्टरौं तैं मिललु जु अस्पतालु मा बिमारू तैं अपणि सेवा दिंणा छन।
स्वास्थ्य सचिव बोलि कि 60 सालै उमर तैं पूरि करण बाद कैबि जंणगुरु डॉक्टर तैं प्रशासनिक अर वित्तीय पद नी दियें जालु। उंकी तैनाती मुख्य सलाह देंणा वास्ता उंकी विधा क खाली पदु मा हि दिये जाली। उन्न बोलि कि चिकित्सा अधिकारियों तैं अगने पदोन्नति नीं दिये जाली।