स्मार्ट सिटी देरादूण क जनता खूंणि मुण्डरु बणिग्यें, मेयरा न लगें परियोजना मा भ्रष्टाचार क आरोप
देरादूण। देरादूण के मेयर सुनील उनियाल गामा न आज मुख्यमंत्री थैं एक चिट्ठी लेखिक देरादूण मा स्मार्ट सिटी परियोजना मा भ्रष्टाचार क आरोप लग्यें अर अबि तक हूंया सर्या कामु मा खर्च हूंया रुप्यौं क जांच करणा क मांग कायी।
मेयर सुनील उनियाल गामा न चिट्ठी मा लेखि स्मार्ट सिटी मिशना क जब सुरुवात ह्वै छायीं, तब वै बगत देरादूण क रैवासियों मा उमंग अर खुसी छायीं। उन्न लेखि कि तिन साल बटि स्मार्ट सिटी क नौं फर जु काम ह्वै, वै से देरादूण क रैवासियों क भावना क दगड़ मा खिलवाड़ ह्वै।
उन्न लेखि क मेयर छौ, बौत पिड़ा च ज्यू मा। स्मार्ट सिटी देरादूण क जनता खूंणि मुण्डरु बणिग्यें। उन्न लेखि कि बात स्मार्ट सिटी क नौं फर देरादूण क खुद्यां सड़िक्यों क कर्यां या खड्वळों की, बेढ़ग से काम करण क कारण पैप लैन टुट्णा क या सीवर लैन की, सबि जगा देरादूण मा ठेकादार बेढ़गा काम करणा खूंणि पछ्यणें जाणा छन।
मेयर लेखि कि मुख्यमंत्री जी स्मार्ट सिटी मा काम करण वलि कम्पनी थैं ब्लैक लिस्ट कर्यें ज्यां। जै से जन प्रतिनिधियों अर प्रदेसाक रैवासियों एक रैबार जाण चैंद। उन्न लेखि कि पल्टन बाजार, परेड ग्राउण्ड, राजपुर रोड मा नाळों कु काम पिछळ साल नवम्बर मा सुरु ह्वै छायीं, जु आज भि जन्न क तन्न हि च।
मेयरा न लेखि कि मुख्यमंत्री जी तुमसे विनती च कि स्मार्ट सिटी देरादूण मा अबि तक हूंया कामु क जांच कर्यें ज्यां जै से स्मार्ट सिटी मा हूंया भष्ट्राचार कु खुलासा ह्वै सक्यां।
स्मार्ट सिटी यामा खास बात या च बल ‘स्मार्ट सिटी प्रोजेक्ट’ प्रधानमंत्री कु सुपिनों क प्रोजेक्ट च। देरादूण मा या से पैळि भि लगातार भाजपा क विधायकनों बल्कि जनता न बि लगातार स्मार्ट सिटी क कामु थैं लेकैकि शिकैत करणि छायीं। अब जब देरादूण के मेयर भि स्मार्ट सिटीके कामु से खुस नीं छन।
इन्ना मेयर सुनील उनियाला क मुख्यमंत्री मंत्री थैं लिखि ईं चिट्ठी न प्रदेस मा भ्युंचळु ऐग्यें। यां से एक बात त साफ ह्वैग्यें की स्मार्ट सिटी क नौं पर प्रदेस क रैवासियों थैं संड़िक्यों मा खड्वळौं अर बेढ़गा कामु अळाव कुछ नीं मिळि। प्रदेस मा स्मार्ट सिटी थैं लेकैकि एकदा राजनीति सुरू ह्वै ग्यायी। अर यु साफ ह्वैग्यें कि स्मार्ट सिटी मा नौं पर देरादूण के रैवासियों क दंगड एक स्मार्ट ‘ठट्ठा’ (मजाक) ही कर्येंग्ये।