सिफर छुट्टी हि न, हम सब्यौं थैं अपड़ा त्योवार मिलि कैकि अर मतंग से मनौण चैंदन : मुख्यमंत्री धामी

देरादूण। लोक त्योवार इगास पर छुट्टी कै कि मुख्यमंत्री धामी क चौछ्ड़ि गुणगान हूंणा छन। दूसर तरफ मुख्यमंत्री कु ब्वन च कि सिरफ छुट्टी कैकि हमरि लोकसंस्कृति अगनै नि बढ़ि सकदि। उन्न बोलि कि हम सब्यौं थैं अगनै बढ़िक अपड़ा यु त्योवारू थैं मिल कैकि अर खुसी-खुसी से मनौंण चैंद।

दीवळी क 11 दिन बाद एकादशी खूंणि उत्तराखण्ड मा इगास (बूढ़ी दीवाळी) मनौंणा कु पुरणु रिवाज च।

मुख्यमंत्री न पिछळ साल भि इगास त्योवार मा छुट्टी कै छायी। जैका बाद बौत बड़ी संख्या मा लोगुन अपड़ा गौं मा जै कि इगास कु त्योवार मन्यें छायीं। ऐसु क साल भि इगास फर छुट्टी क जाणकारि मुख्यमंत्री न अपड़ा फेसबुक एकाउण्ट क जरिया गढ़वाळि मा लेखिक दे।

जैका बाद अब मुख्यमंत्री धामीन प्रदेस क रैवासियों से विनीति कायी कि ह्वै सक्यां त अपड़ा गौं मा जै कि अपड़ा रिवाजु क दगड़ा मा लोकपर्व इगास थैं मन्याँ। उन्न खास कैकि नै पीढ़ि से लोकपर्व इगास खुसी-खुसी मनौंणा के विनीति कायी। जै मा खास बात या च नै पीढ़ि इगास मनौंण खूंणि मतंग दिख्येंणि। इगास फर छुट्टी हूंण से सर्या प्रदेस मा इगास थैं मतंग से मनौंणा क पहल सुरू ह्वैग्यें।

लोकपर्व अर अपड़ि पछ्याण थैं अगनै बढ़ौंणा क ईं कोसिस खूंणि मुख्यमंत्री धामी क चौछ्ड़ि गुणगान हूंण छन।