झूळा पुळ क जगा मा हि बणळु सिंगटाली कु मोटर पुळ : सतपाल महाराज

देरादूण। लोगुक भावनौं तैं देखिक गढ़वाल अर कुमौं तैं ज्वड़ण वळु सिंगटाली मोटर पुळ अपड़ि जगा मा हि बणळु अर अब जल्दी हि पुळ बणौंणा कु काम सुरु ह्वै जालु। या बात प्रदेसा लोक निर्माण, पर्यटन, सिंचाई, लघु सिंचाई, पंचायती राज, ग्रामीण निर्माण, जलागम प्रबन्धन, धर्मस्व अर संस्कृति मंत्री सतपाल महाराज न सिंगटाली मोटर पुल संघर्ष समिति क प्रतिनिधिमंडल क दगड़ भेंट कैकि बोलि।

महाराजन बोलि कि मिन लोनिवि क प्रमुख तैं आंगणन कैकि प्रस्ताव शासन तैं देंण क निर्देश दे याली।

बतै दियां कि साल 2006 मा मंजूर हूंयू सिंगटाली मोटर पुळ बणौंण खूंणि व्यास घाट बटि कौड़ियाल मोटर मार्ग खूंणि वित्तीय अर प्रशासनिक मंजूरि जारी कर्यें ग्यें छायीं पर 2020 मा उबरि क सरकारन ये थैं निरस्त कै दे छायी।

2021 मा दुबरा वीं जगा मा पुळ बणौंण कु फैसळा ह्वै, जख खूंणि साल 2006 मा शासनादेस जारी ह्वै छायी। यु शासनादेस 18 मई 2021 मा जारी ह्वै छायी। 114 करोड़ रुप्यौं से बणण वलु पुळ गढ़वाल अर कुमौं तैं ज्वड़ळु। जै खूंणि जियोलॉजिकल सर्वेक्षण, डिजाइन ड्राइंग अर रुप्यौं कु बन्दबस्त बि ह्वैग्यें छायी । पैलि पुल बणौंण वळु संस्था विश्व बैंक छायी, बाद मा कार्यदायी संस्था अधिशासी अभियंता निर्माण खंड लोक निर्माण विभाग श्रीनगर तैं बण्यें ग्यें।

लोनिवि मंत्री न बोलि कि अब जख सिंगटाली झूळा पुळ च वखि मा मोटर पुळ बणौंणा खूंणि निर्देश दियेंग्यींन। यांका बाद मोटर पुळ कु डिजाइन अर डीपीआर त्यार करणा खूंणि मार्च 2023 मा आईआईटी रुड़की न जांच कै याली।