श्रीनगर मा लगि भू-कानून अर मूल निवास धै

श्रीनगर। भू-कानून अर मूल निवास क मांग तैं लेकैकि श्रीनगर गढ़वाळ मा स्वाभिमान महारैली उर्यें ग्यायी। स्वाभिमान महारैली मा हजारों लोग पौछ्याँ छायीं। महारैली मा कांग्रेस, यूकेडी अर सामाजिक संगठनों का लोग सामिल छायी।

श्रीनगर स्वाभिमान महारैली श्रीनगरा क बजार बिटि ह्वेकैकी गोला बजार पौंछि। गोला बजार मा महारैली मा प्रदर्शनकारियों न प्रदेस सरकार क खिलाप खूब नारा बाजी कायी अर प्रदेस मा भू कानून अर मूल निवास लागू करणा मांग कायी। ऐ मौका पर लोगुन अंकिता भंडारी मामला मा कारवै करण की मांग बि कायी।

स्वाभिमान महारैली मा पौछ्यां कांग्रेसा विधायकन बोलि कि प्रदेस सरकारक मंसा प्रदेस मा भू-कानून ल्याणा की कतै नीं च। उन्न बोलि आज उत्तराखण्ड तैं ब्येचिकी भैरा लोगु तैं यख बसै जाणु च। भैरा लोगु तैं नौकरि दियें जाणि च। उन्न बोलि कि प्रदेस मा मूल निवास लागू ह्वे जालु त यांकु फैदा प्रदेसा लोगु तैं होलु।

ऐ मौका पर मूल निवास, भू कानूनन समन्वय समिति क संयोजन मोहित डिमरी न बोलि कि मूल निवास स्वाभिमान आंदोलन तैं जन लोगु क दगुड मिलणु च अर जन लोग महारैली मा आणा छन वां से इन्नु लगणु च कि प्रदेसा मा मूल निवास अर भू-कानून क बौत दरकार च। मोहित डिमरी न बोलि आन्दोलन सर्या प्रदेसा मा करै जाणु च। सबि लोग मूल निवास अर भू-कानून क मांग करणा छन पर प्रदेस सरकार कुछ नी करणि च।

लूशुन टोडरिया न बोलि कि मूल निवास स्वाभिमान आंदोलन अब उत्तराखण्ड राज्य आन्दोलन क जन्नि अगनै बढ़णु च। आन्दोलन तैं सब्यौं कु दगुड़ मिलणु च। उन्न बोलि श्रीनगरा रैली मा जन लोग अयां छन वै से साफ च कि लोग अब बदलाव चाणा छन।