शिक्षा मंत्रीन परफॉर्मेस ग्रेडिंग इंडेक्स रिपोर्ट मा पिछनै रैंण फर विभागीय अधिकारियों थैं खूब झपौड़ि

देरादूण। विद्यालयी शिक्षा मंत्री डॉ धन सिंह रावतन आज शिक्षा महानिदेशालय ननूरखेड़ा मा विभागीय समीक्षा बैठक मा भारत सरकार के बरस 2017 बटि 2021 तकाकि परफॉर्मेस ग्रेडिंग इंडेक्स रिपोर्ट मा पिछनै रैंण फर विभागीय अधिकारियों थैं खूब झपौड़ि। डॉ धन सिंह रावतन पीजीआई स्कोर क बारा मा भारत सरकार क यूडाइस पोर्टल क जिम्मेदरि निभौंण वळा अधिकारियों थैं ऐ बारा मा जवाब देंण खूंणि बोलि अर जिलों मा दगड़ बातचीत मा लापरवै करण वळा अधिकारियों फर कारवै क निर्देश बड़ा अफसरू थैं दीं।

डॉ. धन सिंह रावतन सबि विभागीय अधिकारियों थैं ईमानदारि से काम करणा खूंणि बोलि। शिक्षा मंत्री न प्रदेस क डायट मा प्रवक्ता अर वरिष्ठ प्रवक्ताओं क खाली पदु थैं भ्वरणा खूंणि डायट क नियमावली त्यार कैकि कैबिनेट मा देंण क निर्देश दीं। उन्न बोलि कि डायट शिक्षा विभागा कु खास संस्थान च जै थै। एनईपी 2020 क गाइडलैन फर काम करणा खूंणि अफु थैं त्यार करण प्वाड़ळु। उन्न बोलि कि डायटा क अलग से नियमावली अर कैडर बण्यें जाणु जरूरी च। शिक्षा मंत्रीन विभाग थैं दियां बजट थैं मट्ठु मट्ठु कैकि खरच करण फर भि अपड़ि टणाक (नारजगी) दिखें।

ऐ मौका फर सचिव विद्यालयी शिक्षा रविनाथ रमन, अपर सचिव योगेन्द्र यादव, महानिदेशक विद्यालयी शिक्षा बंशीधर तिवारी, निदेशक माध्यमिक शिक्षा आर.के. कुंवर, निदेशक सीमैट सीमा जौनसारी, निदेशक बेसिक वंदना गर्ब्याल, एपीडी समग्र शिक्षा डॉ. मुकुल सती छायीं।