सतपाल महाराजन न रुद्रप्रयाग मा लोक निर्माण विभाग अर पंचैत राज विभाग क 625.62 लाख रुप्यौं क विकासा योजनौं कु लोकापर्ण अर शिलान्यास कायी

रुद्रप्रयाग: पंचैत कटकुट ह्वैकि अपड़ि आर्थिकी कु साधन अफि त्यार कर्यां अर अधिकारी छ्वटि छ्वटि दिकदारियों कु झट से ठीक कर्यां या बात रुद्रप्रयाग मा लोक निर्माण अर पंचैत राज विभाग क 625.62 लाख रुप्यौं क विकासा योजनौं कु लोकापर्ण अर शिलान्यास पर प्रदेस क पर्यटन, लोक निर्माण धर्मस्व अर संस्कृति मंत्री सतपाल महाराजन बोलि।

सतपाल महाराजन तिलवाड़ा मा पर्यटक आवास गृह मा पार्टी क कार्यकर्तौं क दगड़ा भेंट कायी अर उंकी दिकदरि थैं सूंणि अर अफसरु थैं झट समस्या कु हल करणा खूंणि बोलि।

सतपाल महाराजन बोलि कि पर्यटक आंखौंळ दिय्खला त रुद्रप्रयाग बौत जादा खास च। अर यखकि पर्यटक जगों थैं पर्यटन सर्किट बण्यें जाणा खूंणि सरकार लगातार कोसिस करणि च। पूरणा मंदिरू थैं औरि जादा अच्छु अर उंका बार मा मनखियों थैं बत्यें जाणु च। कार्तिक स्वामी अर कालीमठ थैं औरि अच्छु बण्यें जालु। महाराजन लोक निर्माण क अफसरू थैं बोलि कि जनपद मा जतगा भि सड़क छन, वु मा आणा जाणा मा कु दिककत नीं हूंण चैंद, सड़िक्यों मा खडवळ नीं हूंण चैंद, सड़िक्यों क खडवळ भ्वरें ज्यां।

महाराजन राज्य योजना मा रुद्रप्रयाग क अगस्त्यमुनि मा डूंगरा (बच्छणस्यूं) बटि आरस्यूं मोटर मार्ग थैं बणौंणा मा रुप्यां 97.51 लाख, कु शिलान्यास, केदारनाथ विधानसभा मा बांसवाड़ा बटि किरोदी-जलई-गैर-कंडारा मोटर मार्ग खूंणि 147.00 लाख रुप्यौं कु लोकार्पण अर राज्य योजना (नाबार्ड-24) बटि विधानसभा तोक रुद्रप्रयाग क विकासखंड अगस्त्यमुनि क कोटेश्वर मा अलकनंदा नदी फर 46 मीटर स्पान स्टील गार्डर लुवा कु पुळ बणौंणा खूंणि 85.93 लाख रुप्यौं कु लोकार्पण। विकासखंड जखोली मा धान्यू कोटी घरड़ा मोटर मार्ग कु डामरीकरण खूंणि 156.12 लाख रुप्या अर जिला योजना मा केदारनाथ विधानसभा मा भटवाड़ी-सुनार- चंद्रापुरी मोटर मार्ग खूंणि 33.60 लाख रुप्यौं कु शिलान्यास कायी।