सतपाल महाराज न केन्द्रीय नागर विमानन अर इस्पात मंत्री ज्योतिरादित्य सिंधिया से भेंट कायीं, प्रदेस मा अंतर्राष्ट्रीय हवै जाज कु अड्डा क बतै दरकार

नै दिली। प्रदेसा पर्यटन, लोक निर्माण, सिंचाई, लघु सिंचाई, ग्रामीण निर्माण, पंचायत राज, जलागम प्रबंधन, संस्कृति अर धर्मस्व मंत्री सतपाल महाराज न केन्द्रीय नागर विमानन अर इस्पात मंत्री ज्योतिरादित्य सिंधिया से भेंट कायीं।

महारान ऊथैं उत्तराखण्ड मा अंतर्राष्ट्रीय हवै जाज कु अड्डा जरुरत क बारा मा बतै। महाराजन न बोलि कि द्यब्तौं क भूमि उत्तराखण्ड पर्यटन, योग अर आस्था कु केन्द्र च। बदरीनाथ, केदारनाथ, गंगोत्री अर यमुनोत्री चारधाम यखि छन। यख हारा बोण, नेशनल पार्क बौत लौगुक दय्खणा खूंण बौत अच्छा छन। उन्न बोलि कि आध्यात्मिक, सामरिक महत्व थैं देखिक उत्तराखण्ड मा अंतर्राष्ट्रीय हवै जाज अड्डा क बौत जरुरत च।

पर्यटन मंत्री न बोलि कि उत्तराखण्ड मा अंतर्राष्ट्रीय हवै अड्डा बणौंणा खूंणि एक जगा मा 1200 हेक्टेयर, अर दुसर जगा मा 1100 हेक्टेयर जमीन हमन खोजि याळी।

ऐ मौका फर महाराजन हवै जाज मा जातरियों थैं उत्तराखण्ड कु खाणु थैं दियें जाणा क बारा मा भि बोलि, जै बारा केन्द्रीय नागरिक उड्डयन मंत्री ज्योतिरादित्य सिंधिया न बोलि कि उत्तराखण्ड क जतगा भि खाण- पिणा क चीज छन लेखीक ऊथैं दियें ज्यां, जै फर अगनै कारवै कराळा।

ऐ मौका फर पर्यटन मंत्री सतपाल महाराजन क दगड़ मा आईएचएम के प्रधानाचार्य जगदीप खन्ना भि छायीं।