कैबिनेट मंत्री सतपाल महाराजन गोपेश्वर मा कायी 565.43 लाख रुप्यौं क विकासा योजनौं कु लोकार्पण अर शिलान्यास

गोपेश्वर: प्रदेस क पर्यटन, लोक निर्माण मंत्री सतपाल महाराजन अपड़ा तिन दिनाकु गढ़वाल दौरा मा आज तिसरु दिन गोपेश्वर मा पंचैत राज अर लोक निर्माण विभाग क 565.43 लाख रुप्यौं विकासा क योजनौं कु लोकार्पण अर शिलान्यास कायी।

ऐ मौका फर पर्यटन मंत्री न ह्यूंद क मैनौं मा तीरथ अर पर्यटन थैं बढौंणा खूंणि जोर द्यायी अर बोलि चारधाम जातरा क अलौंव हमरा औरि जु भि धार्मिक अर पर्यटना क जगा छन उथैं थैं भि अगनैं बणौंणा कोसिस हूंण चैंद। जै से ह्यूंद क मैनौं मा यख पर्यटकों क आणु-जाणु लग्यां रैय्यां। उन्न बोलि कि पंच बदरी अर केदाराक ह्यूंद क मैनौं क गद्दीस्थलु बटि आरती अर पूजाएं ळोगु थै ंदिखौंणा क बन्दबस्त कर्यें ज्यां। उन्न बोलि कि धार्मिक अर पर्यटक जगों थैं एक सर्किट मा ज्वड़ें ज्यां। उन्न बतै की भवैष्य बदरी, कार्तिक स्वामी अर कालीमठा कु विकासा क योजना त्यार ह्वैग्यें अर अब टिम्मरसैंण महादेव क जातरा सजिलु बणौंणा क त्यारि कर्यंे ज्यां। औली, गौरसों मा स्कीइंग थैं बढ़ौंणा मा काम कर्ये ज्यां। महाराजन बोलि कि जिला मा हव्वै पट्टी खूंणि जमीन ख्वजें ज्यां।

कैबिनेट मंत्री सतपाल महाराजन बोलि गोपेश्वर मा जाम क दकदरि खंूणि बाईपास बण्यें ज्यां। उन्न गोपेश्वर मा रिंग रोड़ कु प्रस्ताव त्यार करणा खूंणि बोलि। सड़क बणौंण वळि संस्था थैं बोलि कि सड़िक्यों मा पाणि जमा नीं हूण चैंद या खूंणि नाळि बण्यें ज्यां अर सड़िक्यों क किनरौं फर जम्यां झाड़-झंकार थैं कट्यें ज्यां। उन्न बोलि कि सड़िक्यों मा खवडळवा नीं हूंण चैंद।

सतपाल महाराजन बोलि कि पंचैतु क आमदनी बणौंणा फर जोर दियें जाण चैंद। सतपाल महाराजन जिमदारु क आय बढ़ौंणा खूंणि प्रदेस क उत्पादु क ब्राडिंग, पैकेजिंग अर मार्केटिंग करणा खूंणि बोलि। महाराजन बोण मा फळु क डाळा लगौंणा खूंणि वन विभाग थैं अभियान चलौंणा खूंणि बोलि।

सतपाल महाराजन सबि अफसरू थैं बोलि कि यु तय हूंण चैंद कि विकासा क कामु क दगड़ा-दगड़ि़ सरकार क चलयीं योजनौं कु फैदा प्रदेस के रैवासियों थैं मिलण चैंद।

बैठक मा जिलाधिकारी हिमांशु खुराना न जनपद मा चलण वळि विकासा क योजनौं कु तरक्कि क बारा मा कैबिनेट मंत्री महाराज थैं बतै।

ऐ मौका फर कर्णप्रयाग विधायक अनिल नौटियाल, थराली विधायक भूपाल राम टम्टा, भाजपा जिलाध्यक्ष रमेश मैखुरी, सहकारी बैंक क अध्यक्ष गजेन्द्र रावत अर औरि जन नेतौं क दगड़ जिलाधिकारी हिमांशु खुराना, पुलिस अधीक्षक प्रमेन्द्र डोबाल, सीडीओ डॉ. ललित नारायण मिश्र अर विभागु का जिला स्तरीय अधिकारी छायीं।