सल्ट उपचुनाव, महेश जीना भाजपा क प्रत्याशी घोषित

सल्ट विधानसभा उपचुनौ मा भाजपा न अपडु प्रत्याशी घोषित कैरि द्यायी। विधायक सुरेन्द्र सिंह जीना क म्वरणा क बाद खाळी सल्ट सीट पर भाजपा न ऊंका बड़ा भैजि महेश जीना थैं प्रत्याशी घोषित कैरि याळी। जीना 30 मार्च खूणि अपडु़ नामांकन भ्वराळा।

सल्ट उपचुनौ मा महेश जीना थैं टिकट दे कैकि भाजपा लगातार तीसर बार सहानुभुति कार्ड पर दांव लगाणि च। सल्ट विधान सभा चुनौं भाजपा अर नैं-नैं बड्या मुख्यमंत्री खूंणि एक बडी़ परीक्षा च।

दूसर तरफ सल्ट चुनौं मा कांग्रेस भि अपड़ि पूरी ताकत लगाड़ि च। सल्ट विधान सभा मा कांग्रेस थैं कमजोर न ब्वळि जै सकदू किलैकि पिछल चुनौं मा कांग्रेस केवळ 3000 वोट से हारी छायीं।

सल्ट विधानसभा मा 95,240 मतदाता छन। जैमा 48,682, आदिम अर 46,559 ब्यटुळा छन। सल्ट विधान सभा मा 17 अप्रैळ खूणि वोटिंग अर 2 मई खूंणि गिनती ह्वैळी।