सड़िक्यों मा कतगा खड्वळा भवरें ग्यीं, मुख्यमंत्री धामीन मांगि एक हपता मा रिपोर्ट

देरादूण। मुख्यमंत्री धामीन आज सचिवालय मा उर्ईं बैठक मा हरद्वार, कॉरिडोर, पिथौरागढ़ एयरपोर्ट , मानसखण्ड कॉरिडोर, रामनगर, रानीखेत सड़क मार्ग , मां पूर्णागिरि धाम मा हूंणि वळा विकासा कामु क जाणकारि ल्यें। मुख्यमंत्री न अफसरू थैं आदेश दीं अर पूछि कि सड़िक्यों क खड्वळा भवरणा अर टामण (मरम्मत) कु अबि तक कतगा काम ह्वै, अर कतका काम अबि बच्यूं च। उन्न बोलि एक हपता मा बच्यां कामु क सर्या जाणकारि बत्यें ज्यां।

मुख्यमंत्री न बोलि सजिलु जातरा जनता कु अधिकार च। उन्न बोलि बल जनतै क सुविधौं कु साख ख्याल रखणु राज्य सरकार कु पैळु काम च। मुख्यमंत्री अधिकारियों थैं निर्देश दीं अर बोलि कि सड़िक्यों कु टामण (मरम्मत) कु अर खड्वळों थैं भवरणा कु काम बगत पर पूरू कर्यें ज्यां अर काम बौत अच्छु हूंया यांकु खास ध्यान रखें ज्यां।

बैठक मा मुख्य सचिव डॉ. एस.एस. संधु, पुलिस महानिदेशक अशोक कुमार, अपर मुख्य सचिव श्रीमती राधा रतूड़ी अर औरि बड़ा अफसर छायी।