सबूत मिटौंणा क चाल च या आग

गंगा भोगपुर मा पुलकित आर्य क आंवला कैंडी फैक्टरी मा आग लगिग्यें। आग इतगा तेज छायीं कि आग बुझौंणा मा फायर ब्रिगेड क टीम थैं बौत मेनत करण प्वाड़। पुलिस दावा करणि च कि फैक्ट्ररी मा आग शॉर्ट सर्किट क कारण लगि।

शॉर्ट सर्किटळ आग, कै सवालु थैं जनम देंणि च। सवाल इन्न छन कि जब एक मैना बटि रिजॉर्ट मा बिजली बन्द च, इन्न मा या बात गौळा बटि उन्दु नीं जाणि च कि जख एक मौना बटि बिजली नीं च, वख बिजली क शॉर्ट सर्किटन आग कनैकैकि लगि सकदि? पुलिस इनवर्टरा क बैटरी थैं आग लगणा कु कारण बतौंणि च। स्वचण वलि बात त जै फैक्टरी मा जख 1 मैना बटि बिजली नीं च, वख इनवर्टर कन कैकि चार्ज हूंणि छन। इन्न मा पुलिसाक या बात कि आग इनवर्टर क बैटरी ल लगीं ह्वैळी। थैं कन्न्नु कै कि सै मन्यें जै कसदु।

ईं वु कारण च बल शक क सुईं साफ बतौंणि छन कि या आग लगी नीं च बल्कि जाणि बुझिक लग्यें ग्यें। अंकिता कु कतल क 1 मैना से जादा बगत ह्वैग्यें अर पुलिस वैं खास मैमान थैं ख्वजणु त दूर अबि तक वैंकु नौं तक नी बतै साकी।

यांका बाद दूसर तरफौं या खबर आणि च कि पुलकित आर्य क घरवळि आंवला फैक्टरी मा ऐ छायीं अर वींन गाैं वळों तैं बोलि बल अब मि आंवला फैक्टरी थैं चलौंलु। जब सर्या रिजॉर्ट अर आंवला फैक्टरी जांच क घेरा मा च, त इन्न मा पुलकित आर्य क घरवळि फैक्टरी चलौंणा क बात कनकैकि करणि च।

पुलकित आर्य क रिजॉर्ट मा पिछनै बणि आंवला कैंडी फैक्टरी मा पुलिस लगातार ज्ग्वाळि करणि च। वख कैथैं भि जाणा क मंजूरी नीं च। इन्न मा सवाल अब यौं च कि पुलकित आर्य क घरवळि आंवला फैक्टरी मा किलै ऐ। अर कैल वीं थैं वख आण दे।

पुलकित आर्य क घरवळि कु फैक्टरी मा आणु भि बौत सर्या सवाल खड़ा करणु च। अब शक मा पुलकित आर्य क घरवळि फर बि च। आखिर किलै वींक फैक्टरी मा आणा क बाद फैक्टरी मा आग लगिग्यें।

पुलकित आर्य के रिजॉट थैं कबि बुलडोजरल त्वडे़ जान्द, त कबि रिजॉर्ट मा आग लगें कि सबूत मिटौंणा क चाल? अर अब एक मैना बाद आंवळा कैंडी फैक्टरी मा आग, सबूत मिटौंणा कु काम नीं त औरि क्या च? साफ च कि आंवला फैक्टरी मा आग लगि नीं च, कैथैं बचौंणा खूंणि अर सबूत मिटौंणा खूंण या आग जाणिबूझिक लग्यें ग्यें।