ऋषिकेश निकाय चुनौ : मास्टर जी की चौतर्फा चलणि च ‘हाम’
जन्नि-जन्नि पूसा मैना अगनै बढ़दे जाणु च उन्न निकाय चुनौ कु खुमार बि चढ़दै जाणु च। उन्न त प्रदेसम निकाय चुनौ मा सबि जगौ पर मुकाबला कांग्रेस अर भाजपा द्वीय दलु क बीच हि च।
यांका बाद प्रदेसम सबसे जादा छ्वीं जै सीट पर हूंणि छन वा च ऋषिकेश सीट। ऋषिकेश सीट एससी उम्मेदवार वास्ता सुरक्षित ह्वे त मास्टर जी न बि कांग्रेस पार्टी बिटि टिकट मांगी। कांग्रेसन दीपक जाटव तें टिकट दे द्यायी। यांका बाद मास्टर जी न निर्दलीय चुनौ लड़णा कु फैसला कायी अर चुनौक मैदान मा उतरि ग्येन।
ऋषिकेश मेयर पद वास्ता भाजपा बिटि शंभू पासवान, कांग्रेस बिटि दीपक प्रताप जाटव, यूकेडी बिटि महेंद्र सिंह अर निर्दलीय दिनेश चन्द्र मैदान मा छन।
ऋशिकेश मा सबसे बड़ी बात जु लोग ब्वना छन, वा च कि भाजपा अर कांग्रेसा द्वियौं का उम्मेदवार उत्तराखण्डी मूला नीं छन। भाजपा उम्मेदवार शंभू कु मूल बिहार त कांग्रेसी उम्मेदवार दीपक जाटव कु मूल उत्तरप्रदेस च। बस यीं बात ऋषिकेश जनता क जिकुड़ि मा बिनाणि च। अर वा से बि जादा कि भाजपा उम्मेदवार शंभू पासवान बिहार बिटि आठ पास छन। कांग्रेसा दीपक जाटव इलाहाबाद बिटि मध्यमा छन। ऋषिकेशम मेयर पदा सबि उम्मेदवारुम निर्दलीय दिनेश चंद ‘मास्टर जी’ सबसे जादा पढ़या लिख्यां छन। मास्टर जी कला स्नातक छन।
इतगा हि ना मास्टर जी क जनता बीच एक अलग पछ्याण च। मास्टर जी न सालु तक ऑटो चलै अर कपड़ा सिलणा कु काम कायी। यांका अलाव मास्टर जी न छ्वटा बच्चों तैं बि पढ़ै।
मास्टर जी चुनौ प्रचार मा बि अलग अलग तरीका अपनौंणा छन। मास्टर जी जख बि प्रचार मा जाणा छन, वखि लोगुक बीच हि काम करण मा लगि जाणा छन।
ऋषिकेशम सबसे जादा पाड़ि मूला लोग छन, इल्लै ऋषिकेशा जनता मास्टरजीक् दगड़ि खड़ी ह्वीं च अर मास्टर जी तैं मेयर पदा वास्ता सबसे लैक उम्मेदवार बतौंणि च।
यीं कारण च ‘मास्टर जी’ ऋषिकेश हि ना बल सर्या प्रदेसम खूब छ्वीं हूंणि छन।
मास्टर जी चुना निसान कुल्हडु च। अर द्विया राष्ट्रीय दल भाजपा अर कांग्रेसन जाटव अर पासवान तैं टिकट देकैकि अपणा खुटौं मा कुल्हडु मरण कु ही काम कायी। बस अब दख्यण वलि बात या च कि मास्टर जी कुल्हडु तैं कतगा पल्यौंदन।