बॉबी पंवार न लगें इमत्यान मा घपतोळ कु आरोप ब्वाळ पेपरु क सील टूट्टि छायीं
देरादूण। उत्तराखण्ड बेरोजगार संघा क अध्यक्ष बॉबी पंवारन एक प्रेस वार्ता कैकि एक दा दुबरा इमत्यान मा घपतोळ हूंणा क बात बोलि। उन्न बोलि कि पटवारी अर कनिष्ठ सहायक भर्ति इमत्यानु मा पेपरा सील टूट्टि छायीं।
बॉबी पवार न बोलि बल पटवारी अर कनिष्ठ सहायक भर्ति इमत्यानु न पैळि लगि सीट टूट्टि छायीं अर जै का मत्थी दुबरा सील लग्येग्यें।
बॉबी पंवारन बोलि कि प्रदेश मा अर्न्तराष्ट्रीय, राष्ट्रीय अर प्रदेसा नकल माफिया काम करणा छन। उन्न बोलि कि 25 फरवरी 2023 मा खूंणि देरादूण मा आइ लैट कु इमत्यान ह्वै। अर रात्रि मा 11 फीट लम्बु कन्टेरन मा (गाड़ी) भर्ति इमत्यानु क ओएमआर सीट दिल्ली लिज्यें जाणि छायीं वीं गाड़ी थैं मोहन्ड मा द्वी उत्तराखण्ड नम्बरा क गाड़ियों न रोकि अर केन्टरन कु ताळु ही नी तोड़ि बल केन्टनरा क भितर डिजीटल तोळु बि तोड़ि अर लॉकर बटि ओएमआर सीट निकलिन।
बॉबी पंवार न बोलि कि बेरोजगार संघ खळाखळ भर्ति इमत्यानु तैं पारदर्शी करौंणा क मांग करणा करणु च। उन्न बोलि कि कनिष्ठ सहायक भर्ति इमत्यानु मा जु प्रश्नपत्र बच्चों तैं दियेंग्यीं उंकी सील टूट्टि छायीं। उन्न बोलि कि या बात पेपर देंण वला बच्चों न उठें अर खळाखळ उठौंणा छन पर सरकार अर आयोग या बात मनणा खूंणि त्यार ही नीं च।
बॉबी पंवार न बोलि मोहन्ड मा जु ह्वै वु सबि सांठगांठ से ह्वै, भर्तियों मा घपतोळ करण वळों का तार परीक्षा केन्द्र, आयोग अर एजेन्सी से जुड्यां छन। उन्न यु बि बोलि कि यु गिरोह पकड़े जै सकदु छायी पर पुलिसन उथैं पकड़णा खूंणि कुछ बि नी कायी।
बॉबी पंवार न बोलि बल सरकार अपड़ि पीठ अप्फि थपथपौंणि च अर ब्वनी च कि हमन तीन भर्ति इमत्यानु बिना नकळि क उर्यें दीं, जू कतै सच नी च। उन्न यु बि बोलि कि सरकार नकल विरोधी कानून कु गुणगाण बि अफि करणि च अर भर्ति इमत्यानु मा पेपरा सील टुटण पर जु ब्वलें जाणु च कि सड़क खराब छायीं जै से पेपरा सील टूटग्यें कनि मसखरयां बात च जै बातिकु क्वीं मुण्ड न कपाल। उन्न बोलि कि हम ब्वना छा की जन मोहण्ड मा ह्वै सकदु उन्नि पटवारी परीक्षा, कनिष्ठ सहायक भर्ति इमत्यानु मा ह्वै होळु अर पेपर क सील गाड़ी मा हि त्वड़ें ग्यें अर दुबरा लग्यें ग्यें ह्वैली।
बॉबी पंवार न बोल कि उत्तराखंड मा पटवारी परीक्षा, कनिष्ठ सहायक भर्ति इमत्यानु मा पेपरा सीट टूटणा क बात समणि आणि च वा बौत चिंता जनक अर गम्भीर बात च।