रंग ल्याणी च, यूसीसी क पहल

पुष्कर सिंह धामी दिल्ली दौरा फर क्या ग्यीं कि प्रदेस हि न सर्या देस मा सियायी महौल गरम ह्वैग्यें अर सर्या देस क आंखा उत्तराखण्ड क तरफा ह्वैग्यीं। प्रदेस मा सबसे जादा खुसबुस मंत्रीमण्डल मा कुछ हेरफेर हूंणा जादा च। बतै जाणु च कि धामी क दिल्ली दौरा क बाद मंत्री मण्डल कु विस्तार ह्वै जालु। धामी मंत्री पैलि बटि तीन पद खाली छन अर एक पद कैबिनेट मंत्री चन्दन राम दास क म्वरणा क बाद खाली ह्वैग्यें। धामी 2025 तक उत्तराखण्ड तैं सर्या देस मा अग्वानया (अग्रणी) कु राज्य बणौंणा कु लक्ष्य धैरिक काम करणि च अर बिना मंत्रियौं क विभागा काम काज फर फरक प्वाड़णु च। यीं यु कारण च कि धामी अपड़ा मंत्री मण्डल तैं बडु अर वै मा बदलि करणि क खुसबुस जोरशोर से हि नीं हूंणि च। बल दुसर तरफा धामी न हाईकमान क दगड़ प्रदेसा विकास क छ्वीं अर मंत्रिमण्डला क मंत्रियौं क कामु क बारा मा छ्वीं हूंयी, जैका बाद मंत्री बणणा क सुपिना दय्खणा नेतौं क ज्यू की धकधक बणिग्यें।

वखि दूसर तरफा उत्तराखण्ड सरकार प्रदेस मा जल्दी समान नागरिक संहिता लागू करणा तरफा अपड़ा कदम बणाणि च। इल्लै इन्न मन्यें जाणु च कि उत्तराखण्ड मा समान नागरित संहिता लागू करणा कु असर सर्या देस मा प्वाड़ळु। यीं वु बडु कारण च कि ऐ बगत मा सर्या देसा टिकटकि उत्तराखण्ड मा लगि च अर इल्लै धामी कु दिल्ली दौरा खास मन्यें जाणु च। अर इन्न ब्वलें जाणु च कि हाईकामन बटि मंजूरि मिलदा हि मुख्यमंत्री अपड़ा खुट्टाैंं अगनै बढ़ाळा, इन मा उमेद च कि प्रदेस मा बौत जल्दी समान नागरिक संहिता लागू कर्यें जै सकद।

साफ च उत्तराखण्ड मा भाजपा न मंत्री मण्डल मा हेरफेर अर प्रदेस मा समान नागरिक संहिता क त्यारि कै कि 2024 लोकसभा चुनौं क त्यारि सुरु कै याली। भाजपा कु हाईकमान कतै नी चान्दु कि प्रदेस मा विपक्ष कै बि मुद्दा मा प्रदेस सरकार पर हमला कर्यां।

केन्द्र सरकार 2024 लोकसभा चुनौ से पैलि देस मा यूसीसी लागू कैकि बडु हथियार बणाणि च। वखि प्रदेस मा मंत्री मण्डल बढै़ कि प्रदेस मा हूयां भर्ति घोटाळों तैं लेकैकि जनता क ज्यूं मा जु नारजगी च तै दूर करण चाणि च। पर अबि त समान नागरिक संहिता तैं लेकैकि धामी न 2022 विधानसभा मा जु चुनौवी खेल खेलि छायीं वु अब 2024 मा भाजपा खूंणि अबि जीत कु मंतर दिख्येंणु च इल्लै अब प्रधानमंत्री बि यूसीसी तैं देस क जरूरत बतौंणा छन। धामी मंत्री मण्डल कु विस्तार हूंया या न हूंया फर अबि धामी क ‘एक देस, एक कानून’ क बड़ी पहल सर्या देस मा अपड़ु रंग दिखौंण बठिग्यें।