राजनाथ सिंह न सुद्दि नि ब्वाळ धामी थैं धाकड़ बल्ळेबाज

उत्तराखण्ड क मुखिया थैं बार बार बदळे जाणा पर जख प्रदेस मा विपक्ष बार-बार सवाळ करणु च, त भाजपा प्रेदस क मुखिया थैं बदळण क अपड़ा फैसळा थैं अपणि रणनीति क एक हिस्सा बताणि च। य बात पौड़ी मा आज राजनाथ सिंह न मुख्यमंत्री पुष्कर सिंह धामी थैं आखिर ओवरू का धाकड़ बल्ळेबाज बतै क साफ कैरि द्यायी।

राजनाथ सिंह कु भाजपा मा हि न बल्कि देसक सब्बि राजनीतिक दळ भि बड़़ु सम्मान करदी, अर ऊंकी बातू थैं बौत गम्भीरता से लिंदन।

राजनाथ सिंह न आज पौड़ी मा वीर चन्द्र सिह गढ़वाळी क पुण्यतिथि क मौका फर ब्वाळ। उन्न ब्वाळ कि 20-20 क्रिकेट मा धामी थैं आखिर क ओवरू मा खय्ळण खूंणि उतरें ग्यायी। धामी धाकड़ बल्ळेबाज छन। उन्न ब्वाळा कि हमथैं पूरि उम्मीद च क धामी उम्मीदों पर खरा ह्वाळा।

राजनाथ सिंह न धामी थैं धाकड़ बल्ळेबाज सुद्दि नि ब्वाळ, ऊंकी ई बात साफ च धामी हि विधानसभा 2022 चुनौ मा भाजपा मुख्यमंत्री ह्वाळा। भाजपा हाई कमान न धामी पर जु विश्वास कायी, वै विश्वास क बाद धामी क समणि बौत चुनौती छन। धामी क समणि काम जादा अर बगत कम च। सरकार अर जनता मा विश्वास थैं मजबूत करणु अर भाजपा संगठन मा भि कार्यकताओं क उत्साह बढ़ाणा क काम भि उन्थैं हि करण।

राजनाथ सिंह न धामी क बढैं उबरि कायी जब उथैं सबसे जादा जरूर छायीं। ईं बात मा कुईं द्वी राय नि च कि धामी मा काम करणा खूंणि बगत कम च लेकिन धामी कम कगत मा आतिशी पारी हि ख्यळणा छन। धामी क ळळक न छवट्टा सि बगत मा अपड़ा फैसळों, अर अपड़ा काम करणा क तरीकों मा अपणि धमक अर हनक द्विया दिखें द्यायी।