राजेन्द्र पंत अपड़ा दगड़यों क दगड़ यूकेडी मा ह्वीं सामिल, , बोलि दिल्ली वळा दळ प्रदेस क भलै क बारा मा नीं सोचि सकदन

देरादूण। समाजै भलै खूंणि काम करण वळा राजेन्द्र पंत आज अपड़ा दगड़यों क दगड़ मा यूकेडी मा सामिळ ह्वैग्यीं।

यूकेडी क केन्द्रीय अध्यक्ष काशी सिंह ऐरी न उ सब्यौं थैं पार्टीक सदस्यता दिल्यें। या से पैळि राजेन्द्र पंतन अपड़ा दगड़ियों क दगड़ ‘उत्तराखण्ड बचाओ’ पद जातरा निकाळि अर स्व. इंद्रमणि बड़ोनी क मूर्ति मा माळा चढ़े। जैका बाद उन्न वख बटि पैदळ जातरा कैकि शहीद स्मारक मा उत्तराखण्डा क शहीदु थैं श्रद्धांजळि दे अर राज्य आन्दोळनकारियों क सुपिनौं थैं पूरु करणा क सौं ल्यायी।

वैंका बाद उन्न यूकेडी का दफतर मा केद्रीय अध्यक्ष काशी सिंह ऐरी समणि यूकेडी क सदस्यता ल्यायी। काशी सिंह ऐरी न बोलि कि दिल्ली वळा दल प्रदेस क जनता थैं ठगौंणा छन, इल्लै अब प्रदेस थैं बचौंणा खूंणि प्रदेस क ज्वान अब यूकेडी क मा आणा छन।

राजेन्द्र पंतन बोलि कि प्रदेस थैं 22 साळ ह्वैग्यीं अबि तक प्रदेस थैं अपड़ि राजधानी गैरसैंण नी मिळि। उन्न बोलि कि प्रदेस क विभागु मा गड़बड़ि कु क्वीं हिसाब नी च, ज्वान नौनियाळु मा नौकरि नीं च, ई वु कारण छन कि उत्तराखण्ड क्रांन्ति दल मा आण प्वाड़। उन्न बोलि कि युु दिल्ली वळा दळुन प्रदेसा कु भल्लु नीं ह्वै सकदु अर ना उ हमरु प्रदेस क भलै क बारा मा सोचि सकदन।

यूकेडी क केन्द्रीय मीडिया प्रभारी शिवप्रसाद सेमवालन बोलि कि हमथैं अपडु प्रदेस बचौंण च त उत्तराखण्ड कांति दल थैं एक सिपै क तरौं काम करण प्वाड़ळु। उन्न बोलि प्रदेस मा अफसरु कु राज च, अफसर सरकरि मुबैल तक नीं उठौंदा। उन्न बोलि अफसर अपड़ि मतंग मा छन अर कैकि नीं सुणणा छन। उन्न बोलि कि अफसरु क यीं मतंग्या थैं रवक्णा खूंणि यूकेडी थैं जनता क दगड़ मा कान्धु (कन्धा) मिलैकि खड़ु हूंण प्वाडळु।

दिल्ली प्रदेस अध्यक्षा डीडी जोशी न बोलि कि प्रदेस मा स्वास्थ्य बंदबस्त राम भरोसा च अर शिक्षा क तोक मा माफिया राज च, प्रदेस क ज्वान नौन्याळ बेरोजगार घुमणा छन, मैंग्यें इतगा च ळोगुक चुल्खान्दु आग नीं च।

राजेंद्र पन्त क दगड़ यूकेडी क सदस्यता लिंण वळों मा सुधा चौहान, संजय, गोविंद अधिकारी, गौतम कुमार खरे, राजेश आर्य, विजयपाल, दयानंद बजरंगी, प्रदीप, प्रकाश पन्त, राधे श्याम छायीं।

ऐ मौका फर उक्रांद क राष्ट्रीय अध्यक्ष काशी सिंह ऐरी, संरक्षक बीडी रतूड़ी, त्रिवेंद्र सिंह पंवार ,सुरेंद्र कुकरेती, टी एस कार्की, अनुपम खत्री, के एस मेहता, सुनील ध्यानी, सुलोचना ईष्टवाल, उत्तरा पंत, रेखा मियां, दीपक गैरोला, राजेंद्र प्रधान, संजय डोभाल ,केंद्र पाल तोपवाल, राजेंद्र बिष्ट ,राजेश्वरी रावत, किरण रावत, वीरेंद्र रावत, जय प्रकाश उपाध्याय, मधु सेमवाल, मंजू रावत, सरोज रावत, राजेन्द्र गुसाईं अर औरि बौत सर्या कार्यकर्ता छायीं।