4 घण्टा जग्वाल करणा क बाद भरतरी थैं मिलि कार्यभार

देरादूण। उत्तराखण्ड वन महकमा क मुखिया राजीव भरतरी न कोर्ट क आदेश क बाद आज अपणु कार्यभार सम्भाळि याली।

हाईकोर्ट सरकार थैं आज सुबेर 10 बजि तक राजीव भरतरी थैं जार्च देंणा क आदेश दियूं छायी। राजीव भरतरी सुबेर 10 बजि मुख्यालय मा पौंचिग्यें छायी पर शासन क तरफ बटि ऊथैं क्वीं आदेश नीं दियेग्यें। 4 घण्टा जग्वाल करणा क बाद भरतरी थैं कार्यभार दियेग्यें।

बतै दियां कि धामी सरकार थैं नैनीताल हाईकोर्टन आदेश दियूं छायीं कि भरतरी थै मंगलबार सुबेर 10 बजि कार्यभार दिये ज्या। राजीव भरतरी कोर्ट क आदेश क बाद वन मुख्यालय मा सुबेर 10 बजि पौंचिग्यें छायीं अर कार्यभार मिलणा कु जग्वाल करणा रै पर सरकरि छुट्टी हूंणा क कारण वन मुख्यालय मा कर्मचारी थैं शासन बटि आदेश आण मा चार घण्टा लगिग्येन। जै कारण चार घण्टा बाद भरतरी न कार्यभार दियेग्यें।

बतैं दियां कि राजीव भरतीर प्रदेसा सबसे बड़ा आईएफएस अधिकारी छन अर 30 अप्रैल 2023 खूंणि सेवानिवृत्त हूंणा छन। भरतरी क बदलि जैव विविधता बोर्ड मा हूंणा से पैळि भरतरी कॉर्बेट नेशल पार्क मा डाळौं कु अवैध कटाना क जांच करणा छायीं। सरकारन 2 नवंबर 2021 मा ऊंकी बदलि जैव विविधता बोर्ड मा अध्यक्षा पद पर कै दे छायीं। सरकारा ऐ फैसळा कु भरतरी न विरोध कायी। भरतरी क ब्वन छायीं कि ऊंकी बदलि ऊंका संवैधानिक अधिकारु कु उल्लंघन ह्वै।