सड़क सुरक्षा पर सवाल, आखिर जिम्मेबार कोच . . . ?

उत्तराखण्डै राजधानी देरादूणा लक्ष्मीवाला टोलम दुर्घटना दख्यणा खुणि मिलि। जैमा ब्वले ग्यायी के एक ट्रका ब्रेक फेल ह्वेग्यन अर वेन अगने लैन मा लग्यीं गाड़ियों तैं इन्न टक्टकर मारि कि अगने चलणि एक गाड़ी टोल प्लाजा पर बण्यंू खम्बा पर पिचकि ग्यायी।
देरादूण मा हूयीं यीं घटन बाद सड़क सुरक्षा तैं लेकैकि सवाल खड़ा हूंणा छन कि सड़क पर मनखि तैं जिंदगि तैं बचौंण एक कैकि जिम्मेबरि च? या हम खुणि चुनौती बणिग्ये। इन्न मा सवाल यौं बि च आखिर यांकु जिम्मबार कौच?

अबि तक तक हम ब्वना छौ कि गाड़िका ब्रेक फेल ह्वे इल्लै या दुर्घटना ह्वे। वीडिया सोशल मीडिया म वायरल च, वीडिया देखिकि त कतै इन्न नी लगणु च कि गाड़िका ब्रेक फेल ह्वे होला।

इन्न मा बडु़ सवाल च कि आखिर इन्नि घटना कनकैकि ह्वे। यांकु जबाव च कि या घटना गाड़िक ब्रेक फेल हूंण से ना बल या घटना हमर सर्या सिस्टमा ब्रेक फेल हूंण से ह्वे। यीं घटना न साफ के दे कि सड़कियां मा चलण वला सबि गाड़ियों की सुरक्षा जांच बौत जरूरी च। पर हमरु पुलिस प्रशासन तैंत कारवै क नौं पर चलान अर यु बि सिरफ दुपहियों गाड़ियों कु, बड़ी गाड़ी, कार मोटर, डम्फर, ट्रक, बस विक्रम, अर जुगाड़ देखिकि व पुलिस प्रशासन आंखा बुज्यें जन्दिन। टोल प्लाजा घटना डैबर लापरवै च हौरि कुछन जै द्वी कुटुम्दरि की सुख‘शान्ति लुच्छि याली।

या घटना सड़क सुरक्षा क कमजोरि तैं बतौंणि च। सड़कियों पर यातायात नियम कु पालन नी करणु, गाड़ि तेज चलौंणु , गाड़ि चलौंदा मोबाइल चलौंणु, शराब पे कैकि गाड़ि चलौंणु दुर्घटना का कारण बणदन। पर यखक यीं घटना कु असली कारण खनन अर जादा कमौंण चक्कर मा डम्पर जादा चक्कर लगौंणु च। दुसर कारण च नशा अर निंद, जु डैरबर सर्या राति गाड़ि चलौंन्द, वैतै बिनसरि म झपाक (झपकि) ऐ ही जांद। यीं कारण छन, जु दुर्घटना का कारण बणदन अर यीं घटनम कु कारण बि नशा अर निंद हि छायीं।

इन्न मा सरकार तैं चैंद कि कटकुटु कदम उठौंण चैंदन, सड़क सुरक्षा तै लेकैकि लोगु तैं बतौंण चैंद। इन्नि घटना रवक्णा की हम सब्यौं की जिम्मेबरि च। यामा सबि मनखियों, समाज अर प्रशासन तैं मिलिकि काम करण चैंद। लोगु तैं सड़क सुरक्षा वास्ता जिम्मेदार हूंण बौत जरुरी च। समाजम हरेक मनखि तैं सड़क सुरक्षा कु महत्त्व तैं समझण प्वाड़लु अर अपड़ि जिम्मेबरि तैं समझण प्वाड़लु।

डोईवाला टोला या घटना बि लापरवै कु हि नतीजा च। इन्न घटना दुबरा न हूयां यांका वास्ता हमतैं कोसिस करणि प्वाड़लि अर हमरि सड़क तबि सुरक्षित ह्वे सकदि जब हरेक मनखि यातायाता नियम अर अपणि जिम्मेबरि तैं समझलु।