जनता की सुरक्षा प्रदेस सरकार कु पैलु काम च: धामी
मुख्यमंत्री धामिन आज देरादूणा रायपुर तोकम जादा बरखा से प्रभावित क्षेत्र मा जैकि वखक दसा तैं देखि। ऐ मौका पर मुख्यमंत्रिन किरसाली चौक, आईटी पार्क, ननूरखेड़ा, आमवाला, तपोवन, शांति विहारम जैकि वखक रैंण वला लोगु दिक्कतु तैं सूणि। मुख्यमंत्रिन बोलि कि जनता कु सुरक्षा प्रदेस सरकार कु पैलु काम च।
मुख्यमंत्रिन जिला प्रशासन तैं लोगुकि मदत करण का निर्देश दींन। अर बोलि कि नाळी कु रोज सफै करें ज्यां अर जख पाणि भ्वरें जांद वख पाणि निकलणा कु बन्दुबस्त करणा क निर्देश दींन। अर जख जादा खतरा च वख खास सावधानी रखणा वास्ता चेतावनी बोर्ड लगौंणा खुणि बि बोलि।
मुख्यमंत्रिन पुलिस तैं अर सबि विभागु तैं सदनि त्यार रैंणा निर्देश बि दींन। मुख्यमंत्रिन बोलि कि अचाणचक विपदा औंणा पर कम से कम बगत मा फटाफट कारवै हूंण चैंद अर जादा से जादा प्रभावित लोगुक तैं बचौंणा कोसिस हूंण चैंद।
ऐ मौका फर राज्यसभा सांसद नरेश बंसल, आपदा प्रबंधन सलाहकार समिति का उपाध्यक्ष विनय रुहेला, विधायक उमेश शर्मा काऊ अर जिला प्रशासना अधिकारी छायीं।