जन समस्याओं कु झट्ट समाधान हूंण चैंद : मुख्यमंत्री

देरादूण। मुख्यमंत्री धामी न आज सचिवालय मा मुख्यमंत्री थैं औंणा वलि शिकैति चिट्ठियों खूंणि ऑनलाइन पोर्टल पर पंजीकरण अर बगत पर शिकैत कु समाधान प्रणाली थैं शुरू कायी।

अबि तक त मुख्यमंत्री क नौ से आण वलि शिकैतु थैं रजिस्ट्रर मा लेखिकि, जै विभाग क शिकैत च, वे विभाग थैं भेज्यें जान्दू छायीं। अब शिकैत चिट्ठियों थैं सीएम हेल्पलाइन 1905 क दगड़ जोड़ि द्यायी।

ऐ मौका पर मुख्यमंत्री न चंपावत क रैवासी मुकेश राम क शिकैत क बारा मा जाणकारी ल्यायी अर उंका दगड़ा फोन मा बात कायी। मुख्यमंत्री न बोलि क हमन चम्पावत क डीएम थैं शिकैत भेजी याली, शिकैत थैं झट्ठ ठीक करें जाळु।

मुख्यमंत्री न बोलि कि राज्य सरकार क कोसिस जन समस्याओं अर शिकैत थैं झट्ट से ठीक करणा क च। उन्न बोलि कि मुख्यमंत्री हेल्पलैन नम्बर 1905, अपणि सरकार पोर्टल अर भ्रष्टाचार मुक्त उत्तराखण्ड एप 1064 कु 15 दिनों मा अपर मुख्य सचिव मुख्यमंत्री, एक मैना मा मुख्य सचिव अर तीन मैना मा मुख्यमंत्री समीक्षा कारला। उन्न बोलि कि सरलीकरण, समाधान अर निस्तारण पर सरकारकु खास ध्यान च।

मुख्यमंत्री न बतै कि मुख्यमंत्री क दप्तर मा आणा वलि शिकैत अब एक क्लिक मा जै विभाग क शिकैत च वै विभाग क सचिव, विभाग क अधिकारी थैं मिलि जाली। अर शिकैत करणा वला क नम्बर पर एक मैसेज चलि जालु। जै फर शिकैत करण वळु अपड़ि शिकैत क बारा मा जाणाकारी ले सकदू। अर शिकैत जै विभाग क ह्वैली वै विभाग क अधिकारियों थैं वीं शिकैत थैं तय बगता मा ठीक करण प्वड़ालु। तय बगत मा शिकैत ठीक नि हूंण पर शिकैत अफि बड़ा अधिकारियों थैं चलि जाली। अर बगत मा शिकैत ठीक नि हूंण पर अधिकारियों की जिम्मबरि तय करे जाली।

ऐ मौका फर अपर मुख्य सचिव राधा रतूड़ी, विशेष सचिव अभिनव कुमार, सचिव शैलेष बगोली अर उपसचिव अनिल जोशी मौजूद छायी।