जोशीमठ क रैवासियों न कायी होटळ त्वड़णा कु विरोध, ब्वाळ पैळि नोटिस दियें ज्यां

जोशीमठ। जोशीमठ मा हाळात ळगातार खराब हूंदें जाणा छन। भ्वां मा धंसणि जमीन क कारण धौरु मा होटळु मा तिड्वाल बढ़दै जाणि च। ऐ तोक तै प्रशासन रैंण लैक नी च बतै याळी। अर जु घौर अर होटळु मा जादा नुकसान ह्वै वुथैं त्वड़न क त्यारि सुरु ह्वैग्यें। पैळि होटळ मळारी अर माउंट व्यू थैं त्वड़न खूंणि जन्नि प्रशासन क टोळा पौंचि उन्न जोशीमठ क रैवासियों न विरोध सुरु कै दे यांका बाद अबि होटळ त्वड़ना कु काम नी ह्वै।

जोशीमठ मा द्वी होटळु मा बौत बड़ी तिड्वाल ऐग्यें जै कारण होटळ क पाळ एक तरफा झुकि ग्यें।

जोशीमठ क रैवासियों ब्वन च कि बिना नोटिस के होटळ तैं त्वड़ें जाणु च। होटळक माळिक ठाकुर सिंह राणा कु ब्वन च कि मिथैं क्वीं नोटिस नीं मिळि। उन्न बोलि कि यु जनहित मा सै च, मि सरकार क फैसळा क दगड़ मा छौ पर पैळि मिथैं नोटिस मिलणि चैंद। उन्न बोलि कि मिन 2011 मा नक्सा पास कैकि होटळ बण्यें अर आज बिना नोटिस कु होटळ त्वड़ें जाणु च।

जोशीमठ मा अबि तक 678 घोरु तैं प्रशासन न खाळी करणा खूंणि बोलि याली। ळोगु अपडु समान लेकैकि जोशीमठ छ्वणा छन। जोशीमठ मा सड़िक्यों मा तिड्वाळ पोड़िग्यें अर जमीन भ्वां मा धंसणि च जै कारण जगा जगा मा पाणि निकळणु चं।