देरादूण कु राष्ट्रपति आशियाना अब जनताक् वास्ता

देरादूण। राष्ट्रपति द्रौपदी मुर्मू न अपणा तिन दिना दौरा पर देरादूण मा छन। आज 20 जून खुणि उन्न अपणि जनमबार मन्ये। राष्ट्रपति मुर्मू न राष्ट्रीय दृष्टि विकलांग सशक्तिकरण संस्थान म बच्चो क दगड़ि अपणु जनमबार मनये अर दृष्टिबाधित बच्चों दगड़ि संवाद कायी। ऐ मौका पर राष्ट्रपति न विज्ञान प्रदर्शनी अर लैब तैं बि देखि।

ऐ मौका र मुख्यमंत्री धामिन बोलि कि राष्ट्रपति की जिन्दगि संघर्ष, सेवा अर संकल्प की एक मिसाल च। ऊंकी जिन्दगि हम सब्यौं का खुणि एक प्रेरणास्रोत च।

मुख्यमंत्रिन बोलि दिव्यांगजनु वास्ता बौत योजना चलणि छन। अर उत्तराखण्ड सरकार बि इन्नि काम करणि च। हमरि कोसिस च कि दिव्यांगजनु तैं अपड़ा खुट्टौं मा खडु हूंणा वास्ता शिक्षा अर हौरि सुविधा मिलण चैंद।

यांका दगड़ि राष्ट्रपति द्रौपदी मुर्मू न देरादूण कु राष्ट्रपति आशियाना तैं जनता वास्ता खोलि दे। अब 25 जून बिटि लोग राष्ट्रपति कु आशियाना तैं द्याख्ला। राजधानी देरादूणम राजपुर रोड़ मा बण्यूं राष्ट्रपति आशियाना बौत खास च। राष्ट्रपति आवास अब जनता वास्ता ख्वलें ग्यायीं। आज अपणु जनमबार पर राष्ट्रपतिन ऐ आशियाना कु उद्घाटन कायी। अर आज बिटि ऐ आशियाना कु नौं राष्ट्रपति निकेतन धरे ग्यायी। अब जनता तैं यख घुमघाम करणा कु मौका मिललु। यख घुमणा अलावा खाण-पिण सुविधा बि मिललि। राष्ट्रपति द्रौपदी मुर्मू ,राज्यपाल अर मुख्यमंत्री धामिन यख घुमघाम कायी।

राजधानी देरादूणा राजपुर रोड पर 132 एकड़ मा बण्यूं ऐ आशियानम सैकिल ट्रैक, खेल, अस्तबल, फुळु का बाग, पिकनिक, लॉन, जॉगिंग टैªक अर हौरि सुविधा बि छन। यांका अलाव यख कुछ जगा दुकनि बि छन।