सड़िक्यों मा खडवळा अर माटौं क थुपड़ा देखिक महाराजन लोनिवि क अभियंतौं थैं लग्यें लताड

रुद्रप्रयाग: लोक निर्माण, पर्यटन, सिचैं, ग्रामीण निर्माण अर पंचायती राज मंत्री सतपाल महाराजन आज रुद्रप्रयाग जिला मा अपडु तिन दिनकु दौर फर मां कालीमठ मा पूजा कायीं।

ऐ मौका फर सतपाल महाराजन रुद्रप्रयाग जनपदाक रैवासियों क दिकदारि (परेशानी) थैं भि सूंणि।

महाजन न बोलि कि राष्ट्रीय राजमार्ग अर गौं थैं ज्वड़न वळि सड़क बौत खराब च। कालीमठ पौंछण फर ऊथैं बाटा मा जगा-जगा सड़िक्यों मा खडवळा हि खडवळा अर माटौं अर गारौं क थुपड़ा (ढेर) हि थुपड़ा मिलीं। जै कारण उन्न राष्ट्रीय राजमार्ग विभाग लोनिवि अर लोक निर्माण विभाग ऊखीमठ क अभियंतौं थैं जनता क समणि भि खुब लताड़ लग्यें अर बोलि कि 14 नवम्बर तक प्रदेस मा सबि सड़िक्यों मा खवडळौं थैं भ्वरणा क सरकारन सौं लियीं छायीं, फर अभियंतौं क लापरवै क कारण मुख्यमंत्री अर कैबिनेट मंत्री थैं जनतै क नराजगी भुगतण प्वड़नी च। महाराजन बोलि कि जनता नराज च अर ब्वनी च कि चुनौं मा जु वादा कर्यां छायीं ऊथैं पूरु कारा।

महाराजन राष्ट्रीय राजमार्ग विभाग लोनिवि अर लोक निर्माण विभाग अभियंतौं थैं बोलि सड़िक्यों मा जगता भि खडवळा छन अबि भ्वरें ज्यां।

सतपाल महाराज रुद्रप्रयाग तिन दिनकु दौरा मा गुप्ताकाशी मा उर्र्यू दैवीय आपदा सहायता छात्रावास क वार्षिकोत्सव मा भि भाग ल्यायीं।