‘पॉजिटिव अप्रोच’, ‘कमिटमेंट’ और ‘टीम वर्क’ कु कमाल . . .
2.5 करोड़ रुप्यौं कु लक्ष्य। लक्ष्य से जादा 3 लाख करोड़ रुप्यौं कु करार अर करार म 44 करोड़ रुप्यौं कु ह्वै निवेश। यीं आकड़ा धामी सरकार क इन्वेस्टर समिट क सफलता बतौंणा खूंणि बौत छन। निवेश से हटिक बात करदौ त समिट धामी तैं राजनैतिक फैदा बि दे ग्यायी। उत्तराखण्ड म अबि तक कु सबसे बडु आयोजन उर्याणु अर मोदी-शाह कु मुण्ड मा हत्थ, धामी कु सियासी कद तैं हौरि बढ़ैग्यें।
धामी सरकार न ‘उत्तराखण्ड ग्लोबल इन्वेस्टर समिट’ कु लक्ष्य 2.5 करोड़ रुप्या धर्यूं छायीं त जादा लोग ब्वना छायीं कि यु बौत कठिन च। सबि ब्वना छायीं कि छ्वटा सी प्रदेस खूंणि यु बौत बडु लक्ष्य च। पर मुख्यमंत्री धामी न यीं बातिक कतै परवा नीं कायी अर अपणि त्यारि सुरू कै द्यायी। धामी न काबिल अफसरु क टोलि बण्यें कि देस अर विदेस मा रोड शो करिन। निवेशकु दगड़ मीटिंग कायी अपड़ा मंत्रियों दगड़ निवेशकु क समिणि प्रस्ताव रखिन। 30 पॉलिसी म एक-एक कैकि बदलाव कायी अर ऊंतैं दुबरा लागु कर्यें ग्यायी। नै पॉलिसी म निवेशकु तैं कुछ छूट दियें ग्यायी। समिट तैं लेकैकि पैलि खूब त्यारि कर्यें ग्यायी।
मुख्यमंत्री धामी न दिल्ली जैकि प्रधानमंत्री मोदी अर केन्द्रीय गृहमंत्री अमित शाह तैं समिट म औंणा निमंत्रण दे। त दूसर तरफा अफसरु न फॉरेस्ट रिसर्च इंस्टीट्यूट देहरादून म आयोजन उर्याणा कु अर वख सबि सुविधौं कु बन्दबस्त कायी।
‘डेस्टिनेशन उत्तराखण्ड’ क थीम पर समिट मा पाड़ि संस्कृति, पाड़ि खाणु-पीणु अर पाडि परम्पराऔं, पाड़ै पछ्याण तैं नजीक बटि दय्खणा कु मौका द्यायी।
8 दिसम्बर समिट सुरू ह्वै। प्रधानमंत्री न समिट त सुरुवात कायी अर समिटा सर्या जिम्मेबरि अपणा कांधौं म ल्यायी अर उत्तराखण्ड मा पैसा लगौंणा खूंणि अयां निवेशकु तैं भरोसु दे अर बतै कि तुमथैं उत्तराखण्ड मा किलैकि निवेश करण चैंद अर कनकैकि ऊंकु निवेश सुरक्षित रालु। प्रधानमंत्री कै बार धामी क तारिफ कायी।
यांका बाद समिटा समापन पर गृहमंत्री अमित शाह न बोलि धामी उत्तराखण्डा सबसे जादा बरगत (प्रगति) करणा वला मुख्यमंत्री छन।
कुल मिलैकि मुख्यमंत्री क पॉजिटिव अप्रोच, कमिटमेंट, टीम वर्क अर कलेक्टिव एफर्ट्स न ‘उत्तराखण्ड ग्लोबल इन्वेस्टर समिट’ तैं सफल अर ऐतिहासिक बण्यें। सफल इलैकि जब उत्तराखण्ड कु सालाना बजट 60 हजार करोड़ रुप्या च, जैमा एक झटका मा 44 हजार करोड़ रुप्यौं कु निवेश उत्तराखण्ड म सुरू ह्वैग्ये।