बेरोजगारु पर पुलिसन चलै लांठु

देरादूण। उत्तराखण्ड बेरोजगार संघा क ब्वन फर आज प्रदेस बटि अयां हजारौं ज्वानु न देरादूणा कु गांधीपार्क मा प्रदर्शन कायी अर सरकारक खिलाफ नाराबाजी कायी।
प्रदेस मा खळाखळ हूंण भर्ति घपरोळ तैं लेकैकि आज बेराजगारु कु सिरड़ मा राजपुर रोड, घण्टाघर मा जामा हि जाम लग्युं छायीं।

ब्याली बटि बेरोजगार संघा गांधी पार्क मा भैर धरना मा बैठ्यां छायीं। जौ थैं पुळिसन ब्याळी राति अपड़ि तागत क बल पर हटें दे। जै कारण आज बेरोजगारु क नराजगी असमान मा छायीं। आज हजारु क संख्या मा उन्न गांधी पार्क पौंचिक जाम लग्यें दे।। बेराजेगारु क सिरड़ अर संख्या तैं देखिक पुलिस प्रशासन हि ना बल्कि सरकार क हत्थ खुट्टा फुल्यां छायीं अर बेरोजगार सड़कि तैं खाली करणा खूंणि त्यार नीं छायीं।

उंकी मांग छायीं जब तक भर्ति इमत्याुन क जांच नी ह्वै जान्दि तब तक क्वीं भर्ति इमत्यान नीं हूंण चैंद। उंकु ब्वन छायीं कि भर्ति मा हूयां घपरोळु क जांच सीबीआई क हूंण चैंद।

बेराजगारु बोलि कि हम भर्ति इमत्यान दिन्दन अर परचा लीक ह्वै जान्द। जैका बाद दुसर इमत्यान क त्यार करदौ, त वु भि लीक ह्वै जान्द इन्न मा हमरु भवैष्य कु क्या होळ? उन्न बोलि पाड़ बटि ऐ की इमत्यानु क त्यारि करणा छा। अर यख जु भि भर्ति खूंणि इमत्यानु हूंण वैकु परचा लीक ह्वै जाणु च। इन्न मा एक मामळा मा सीबीआई जांच हूंण चैंद।

बेरोजगारु क आन्दोलन मा जन्नि कांग्रेस क पैल्यक अध्यक्ष प्रीतम सिंह अर पैल्यक महानगर अध्यक्ष लालचंद शर्मा पौंचि उन्नि बेरोजगारु न “प्रीतम सिंह गो बैक” क नारा लगौंण सुरु कै दी। जैका बाद प्रीतम सिंह तैं वापिस जाण प्वाड़।

जिलाधिकारी देरादूण जब बेरोजगार कु समझौंण खूंणि पौंचि तक उन्न उंकी बात बि नी सूंणि।

आंदेालन मा उबरि छतराट (भगदड़) ह्वैग्ये जब पुलिस न एक तरफौं सड़क खाळी करणा खूंणि बोलि। पुलिसक ऐ बातिन नाराज ज्वानु , जैका बाद पुलिस अपड़ि तागत दिख्यें अर डण्डा चलौंणा सुरु कै दे। यां से रूस्यां बेरोजगारु न पुलिस वळों पर डुंगा चुटांण सुरु कै दे।

यांका बाद भि बेरोजगार सड़क्यों मा हि बैठ्यां रै। जैका बाद पुलिसन बेराजगारु तैं गिरफ्तार कायी अर गाड़ी मा भौरिक लीग्यें। यांका बाद देरादूण एसएसपी दलीप सिंह कुंवर न पुलिस फोर्स अर पीएसी क ज्वानु क दगड़ मा वखम हि खड़ा छायीं।

मुख्यमंत्री न बोलि –
सुबेर बटि इतगा सबि कुछ हूंणा क बाद मुख्यमंत्री कु बयान ऐ अर उन्न बेरोजगारु तैं बोलि कि तुमर भवैष्य क दगड़ मा क्वीं खिलवाड़ नीं कर्यें जाळु। मुख्यमंत्री न बोलि कि हमन क्वीं घपरोळ नीं कायी अर कै भि घपरोळ तैं दबौंणा क हि कोसिस कायी। उन्न बेराजगारु तैं बोलि कि कैकि बि छ्वीं मा नी ऐय्यां।