पिंडर वैली मा बणाण वळु सीवरेज ट्रीटमेंट प्लांट, हाईकोर्ट न 21 नवम्बर तक सरकार थैं अपडु़ जवाब देंणा खूंणि बोलि

देरादूण। नकरौंदा पिंडर वैली मा बणाण वळु सीवरेज ट्रीटमेंट प्लाट क खिलाफ दायर जनहित याचिका पर आज हाईकोर्ट मा सुंणे ह्वै। ऐ मामला थैं सुंणणा क बाद मुख्य न्यायाधीश विपिन सांघी अर न्यायमूर्ति आरसी खुल्बे क खण्डपीठ न केन्द्र सरकार, केंद्रीय पर्यावरण बोर्ड, राज्य सरकार, राज्य पर्यवारण बोर्ड, सचिव शहरी विकास अर पेयजल निगम थैं नोटिस जारी कायी अर ऐ मामला मा 21 नवम्बर तक अपडु़ जवाब देंणा खूंणि बोलि।

बतै दियां देवेंद्र प्रसाद घिल्डियाल नकरौंदा क रैवासी न एक याचिका हाईकोर्ट मा दायर कै छायीं। उन्न बोलि कि सरकार दुल्हनी नदी मा सीवरेज ट्रीटमेंट प्लांट बणाणि च। ईं नदी कु पाणि गंगा मा जान्दु। उन्न बोलि छायीं क दुल्हनी मा सदनि पाणि रैंद अर यखक मनखि ऐ पाणि थैं पिन्दा छन। या से पैळि ईं नदी मा दून वैळी डिस्टलरी कु गन्दु पाणि भि बुग्यें जान्दु छायीं। जै कारण डायरिया हैजा जन बिमरि हूंण रैन्दन।

उन्न बोलि बल क्षेत्र क रैवासियों न ऐ बारा मा बौत बार शासन अर प्रसासन क दगड़ मा बात कायी पर कैल नि सूंणि। अर शहरी विकास व पेयजल निगम न एक रिपोर्ट मा झूट बोलि कि सीवरेज ट्रीटमेंट प्लांट खूंणि क्षेत्र क रैवासियों न अपड़ि मंजूर दे याली। उन्न याचिका मा एसटीपी प्लांट थैं कखि औरि बणौंणा क मांग कायी।