गरीब जणौं तैं मिलला पक्का घार

उत्तराखण्ड आवास विकास परिषद अर एमडीडीए उत्तराखण्डम सोलह हजार कम कीमता घार (आवास/घर) बणौंणु च।

मुख्यमंत्री धामिन बोलि कि पीएम आवास योजना क जरिया गरीब लोगुक जौ का अपणा घार नी छन, वुतैं पक्का घार बणैकि दिये जाणा छन। उत्तराखण्ड आवास विकास प्राधिकरणन या पर काम करणु च।

उत्तराखण्ड आवास विकास परिषद पन्दरा परियोजना निजी निवेशकु दगड़ि त्यार करणु च। जैमा कुल बारह हजार आठ सौ छप्पन घौर छन। अर हौरि पांच विकास प्राधिकरण बणौंणि च। प्राधिकरणा जरिया कुल 3104 घौर त्यार करे जाणा छन।

अपर आयुक्त आवास पीसी दुम्कन बतै कि अबि तक निजी भागीदारी क दगड़ि मिलिकि लोगु तैं 1760 घौर दिये ग्यींन।

उन्न बोलि कि सबि परियोजना कु काम मार्च 2025 तक पूरू करण कु लक्ष्य च।

यीं योजना मा निजी निवेशक 6 लाख रूप्यौं की कीमता द्वी कमरा, एक रस्वाड़ु, अर शौचालय कु घार त्यार करणु च। जैमा ऊतैं केन्द्र अर प्रदेस सरकारा योजना बिटि साढ़े तीन लाख रूप्या मिलदन। ढाई लाख रुप्यौं कु लोन लेकैकि लाभार्थी तैं घौर मिलि जान्द। जैमा जमीना कीमत अर घौर बणौंणा कु सर्या खरचा निजी निवेशक करदु।
यीं योजना मा तीन लाख से कम रुप्या कमौंण वला अर जौ लोगुम अपडु घौर नीं च ऊतैं घार दिये जाला अर वैतैं 2015 से पैलि उत्तराखण्ड कु रैवासी जरूरी च।

योजना मा मसूरी विकास प्राधिकरण ट्रांसपोर्ट नगर मा 224 , तरला आम वाला म 240 पूरि ह्वेग्येन। धौलासम 240 घौर मार्च 2025 तक त्यार ह्वे जाला।

एमडीडीए उपाध्यक्ष बंशीधर तिवारिन बतै कि परियोजना वास्ता लाभार्थी तैं बगत घौर दिये जाला।