पौड़ी जिलाधिकारी न कोटद्वार बेस अस्पताल म घप्प जैकि कायी निरीक्षण

कोटद्वार। उत्तराखण्ड म डेंगू रुकणा कु नौं नी लिंणु च। शहरू क बाद अब डेंगू क मामला पाड़ म बि बढ़दै जाणा छन। पौड़ी जिलाधिकारी आशीष चौहान न आज राजकीय बेस अस्पताल कोटद्वार कु घप्प (औचक) निरीक्षण कायी। जिलाधिकारी न अस्पतालै बन्दुबस्त देखि अर कंटेनमेंट जोन बण्यें कि घार-घार जैकि डेंगू क जांच करणा बात बोलि।

पौड़ी जिलाधिकारी आशीष चौहान चंद्रमोहन सिंह नेगी राजकीय बेस अस्पताल कोटद्वार पौंछिन अर डेंगु वार्ड कु निरीक्षण कायी। उन्न डेंगु क मरीजु से ऊंक तब्यता बारा म पूछि।

जिलाधिकारी न बतै कि पौड़ी जिला म यमकेश्वर, श्रीनगर अर कोटद्वार म कंट्रोल रूम बणयां छन। उन्न बोलि कि सीएमओ 15 दिन खूंणि कोटद्वार बेस अस्पताल म हि राला। जिलाधिकारी न बोलि कि कोटद्वारा नगर तोक मा कंटेनमेंट जोन बण्यें की घार-घार जैकि स्वास्थ्य कर्मी डेंगू क जांच कराला। उन्न डेंगू तैं बस म करणा खूंणि दवै छिड़कण करणा खूंणि बोलि।

जिलाधिकारी न बोलि कि जख-जख पाणि भ्वर्यूं च वख साफ-सफै कु बन्दबस्त कर्यें ज्यां। बतै दियां कोटद्वारा बेस अस्पताल मा अबि डेंगु वार्ड म 30 मरीज भर्ति छन अर रोज 18, 20 मरीज डेंगू जांच खूंणि अस्पताल आणा छन।