पेपर लीक: मुख्यमंत्रिन बोलि होलि सीबीआई जाचं
मुख्यमंत्री धामि आज परेड गिरौंड मा आंदोलन करणा युवाओं का बीच पौंछिकि उत्तराखण्ड अधीनस्थ सेवा चयन आयोग का इमत्यान की सीबीआई जांच करौंणा बारम मंजूरि द्यायी।
मुख्यमंत्रिन अचाणचक परेड गिरौंड देरादूण मा पौंछिन अर उन्न युवाओं की बात सूणि अर बोलि कि त्योहार औंणा छन तु लोग इगता गरममा बैठ्या छा, मितैं अच्छु नीं लगणु च। मुख्यमंत्रिन बोलि सरकार की एक संकल्प च कि इमत्यान प्रक्रिया पूरि तरौं छाळि हूंण चैंद अर पिछल चार सालु बटि सककार ऐ हि संकल्प पर काम करण च।
मुख्यमंत्रिन बोलि कि वु जणदा छन कि पढ़ै-लिखै करणा बाद सबि युवा सरकरि नौकरि खुणि त्यारि करदन, अर अगनै की जिन्दगि का स्वींण दख्यदन। मुख्यमंत्रिन बोलि कि उन्न इन्नु देखि च, उन्न बोलि युवाओं का बीच रैकि मिन यु अनुभव कायी।
मुख्यमंत्रिन बोलि कि पेपर लीक मामला मा उन्न जांच हाईकोर्टा रिटायर्ड जजा की देखरेख म एसआईटी कारली। कमेटी न काम सुरु कै याली, यांका बाद बि युवा सीबीआई की जांच की मांग करणा छन, यी कारण च ऐ मामला मा सीबीआई जांच की मंजूरि देलि।
मुख्यमंत्रिन बोलि वु चांदा त या बात ऊंका दप्तर मा बि ह्वे सकदि छायीं, पर तुमरि पिड़ा दिखिकि, मिन धरना स्थल आणा कु फैसला ल्यायी। मुख्यमंत्रिन बोलि मि तुमर दगड़ हि छौ।
मुख्यमंत्रिन बोलि कि सरकार न पिछल चार सालु म 25 हजार से जादा सरकरि भर्ति कायी, जैमा क्वीं कि सिकैत नी ऐ। उन्न बोलि सिरफ एक हि मामला मा सिकैत ऐ, इल्लै युवावु कु ज्यूं मा ज्यूं बि सक च, वैतैं दूर करै जालु।
मुख्यंत्रिन बोलि कि पिछल हप्ता जब उन्न ज्वानु दगड़ि बात कायी त उन्न साफ कै दे छायीं कि ज्वानुक ज्यूं मा क्वीं बि सक नी रैंण चैंद, इल्लु मि यख परेड गिरौंड मा अंयु छौ।
मुख्यमंत्रिन बोलि कि आंदोलनम कैबि युवा पर क्वीं बि मुकदमा दर्ज ह्वे त, वैथैं वापिस लिये जालु। उन्न बोलि कि अमृतकाल मा विकसित भारतम उत्तराखण्ड तैं सर्या देसम अग्वानया प्रदेस बणौंणा वास्ता युवाओं की प्रदेस तैं सबसे जादा जरुरत च।