75 इस्कुल्यां नौन्याळु तैं मिलि पंडित दीनदयाल उपाध्याय शैक्षिक उत्कृष्टता पुरस्कार

एससीईआरटी मा पंडित दीनदयाल उपाध्याय शैक्षिक उत्कृष्टता पुरस्कार समारोह उर्यें ग्यायी। जैमा बोर्डा इमत्यानम पैलि 10 नम्बर फर औंण वला दस अर बारा क 75 इस्कुल्यां नौन्याळु तैं ईनाम दियें ग्यायी।

मुख्यमंत्रिन बोलि कि पंडित दीनदयाल उपाध्याय कु ब्वनु छायीं कि शिक्षा पोथी तक ही नीं रैंण चैंद बल शिक्षमा देस प्रेम, नैतिक मूल्य, सामाजिक समरसता कु हूंण बि जरुरी च।

ये ही मकसद खुणि प्रधानमंत्री मोदीन देस म राष्ट्रीय शिक्षा नीति 2020 लागू कैकि शिक्षा बन्दुबस्त तैं हौरि आधुनिक, व्यवहारिक अर गुणवत्ता युक्त बणौंणा दिसा मा काम कायी। उन्न बोलिकि प्रदेस सरकार शिक्षम नवाचार, डिजिटल लर्निंग पर आधारित शिक्षा व्यवस्था तैं हौरि मजबूत बणौंणा वास्ता काम करणि च। उन्न बोलि प्रदेस सरकार एक तरफा इस्कुलौं मा स्मार्ट क्लासरुम, डिजिटल लाइब्रेरी अर ऑनलैन लर्निंग प्लेटफॉर्म विकसित करणा कु काम करणि च। त वखि कक्षा छै, सात अर आठ म इस्कूल्यां बच्चौं तैं ‘हमरि विरासत’ किताबा जरिया देसा समृद्ध, संस्कृति, लोक परम्परा अर देस प्रदेसा महान विभूतियों का बराम बतौंणा कु काम बि करणि च।

मुख्यमंत्रिन बोलि कि प्रदेसम जख एक तरफा 226 इस्कुळ तैं पीएम श्री विद्यालय बण्यें ग्यायीं वखि सबि 13 जनपदु मा 1300 इस्कुळु मा वर्चुअल कक्षा चलै जाणि छन यांका दगड़ि दूर तोक नौन्याळु खुणि पीएम-ई विद्या चैनल चल्ये जाणा छन। उन्न बोलि कि सरकार संघ लोक सेवा आयोग, एनडीए, सीडीएसा इमत्यान पास कैकि साक्षात्कारा त्यारि करणा खुणि 50 हजार रुप्या की मदत करणि च। उन्न बोलि पिछल चार सालु मा हमन 25 हजार से जादा सरकरि नौकरि दींन अर अब गरीब घारा का नौन्याल बि इमत्यानम पास हूंणा छन।
मुख्यमंत्रिन बोलि प्रदेस सरकारन प्रदेसम अल्पसंख्यक शिक्षाकानून लागू कै याली। 1 जुलै 2026सा बाद प्रदेसम केवल वीं मदसरा चलि सकदन जैमा सरकरि बोर्ड कु पाठ्यक्रम पढ़ये जालु।

ऐ मौका फर शिक्षा मंत्री डॉ. धन सिंह रावत, शिक्षा सचिव रविनाथ रामन, महानिदेशक शिक्षा सुश्री दीप्ति सिंह अर हौरि शिक्षा अधिकारी छायीं।