त्रिस्तरीय पंचैत , 21 जून खुणि होलि अधिसूचना जारी

उत्तराखण्ड म हरद्वार जिला तैं छोड़िकि हौरि 12 जिलौं मा त्रिस्तरीय पंचैत चुना करणौं कु काम तेज ह्वेग्ये। पंचैत चुनौ मा आरक्षण प्रस्ताव तय्यार हूंणा बाद आज पंचायती राज निदेशालयन शासन अर राज्य निर्वाचन आयोग तैं आरक्षण प्रस्ताब भेजि याली। आरक्षण प्रस्ताव मिलण बाद अब उत्तराखण्ड शासन, त्रिस्तरीय पंचैत चुनौ क बारम अधिसूचना त्यार करणा कु काम मा लगिग्ये। 21 जून तक त्रिस्तरीय पंचैत चुनौ क बारम अधिसूना जारी ह्वे जाली। पंचैत चुना द्वि बारम कर्ये जाला।

त्रिस्तरीय पंचैत चुना तैं लेकैकि उत्तराखण्ड सरकार अर राज्य निर्वाचन आयोगन अपणि त्यरि पैलि हि पूरि कै याली। इन्न मा 21 जून तैं अधिसूचना जारी हूंणा बाद आचार संहिता लागू ह्वे जाली।
त्रिस्तरीय पंचैत चुनाम 28 से 30 दिन कु बगत लगलु अर 20 जुलै तक त्रिस्तरीय पंचैत चुनौ पूरु हूंणा सम्भौवना च।

अबि त शासन स्तर बिटि त्रिस्तरीय पंचैत चुनौ कु कार्यक्रम पर काम सुरु ह्वेग्ये। अर ब्वलें जाणु च कि
त्रिस्तरीय पंचैत चुनौ द्वी बारम पूरा कर्ये जाला।

पंचैत राज सचिव चंद्रेश यादवन बोलि त्रिस्तरीय पंचैत कु त्यरि सुरु ह्वेग्ये।
ग्राम पंचैत प्रधान वास्ता 7817 पद बिटि एसटी खुणि 226 पद, एससी खुणि 1467 पद, ओबीसी खुणि 1250 पद आरक्षित छन। बाकी बच्यां पदु तैं अनारक्षित करे ग्यायी।
ग्राम पंचैत प्रधान का कुल पदु बिटि 7817 पदु 50 प्रतिशत से जादा पद आरक्षित कर्या छन।

12 जिलों का 89 ब्लाक पंचैत प्रमुखों कु चुनौ बि हूंण। जैमा एसटी खुणि 3, एससी खुणि18 अर ओबीसी खुणि 15 पद आरक्षित कर्ये ग्यीन। इन्नि प्रदेसम जिला पंचैत अध्यक्षा 12 पदु पर बि चुनौ हूंणिन।

चंद्रेश यादवन बोलि कि बौत जल्दी चुनौ की अधिसूचना जारी करे जाली।