पंचैत भवनु म उत्तराखण्डा की विरासत अन्द्वार हूंण चैंद : मुख्यमंत्री धामी

देरादूण। हरेक विकासखण्ड मा पचपन गौं तैं आदर्श गौं बणै ज्यां। आदर्श ग्राम मुख्यमंत्री ग्राम चौपालों म उच्चाधिकारी बि सामिल हूयां। या बात मुख्यमंत्री न सचिवालय म पंचायतीराज विभागा समीक्षा बैठक मा बोलि। मुख्यमंत्री न पंचैत भवन बणौंणा खुणि 10 लाख रुप्यौं क राशि तैं बढ़ै कि 20 लाख रुप्या करणा क निर्देश दींन। उन्न बोलि कि देसा 100 आदर्श गौं म उत्तराखण्ड 10 गौं का नौं सामिल हूंण चैंदन, या खुणि गौं कु विकास खुणि योजना बणै कि काम करै ज्यां। गौं म उर्यीं चौपाल म शासनका बड़ा अधिकारी अर जनपदा जिलाधिकारी बि भाग लियां अर गौं वलों क दगड़ि बैठिकि गौं क विकास योजना पर काम कर्यां। गौं क स्थापना दिवस तैं कौथिग जन मन्ये ज्यां।

मुख्यमंत्री न बैठक म अधिकारियों तैं निर्देश दींन कि मानक तय कैकि पंचायत भवन बणै ज्यां। पंचैत भवन पाड़ि शैली म बणै, जैमा उत्तराखण्ड विरासत क अन्द्वार औंण चैंद।

मुख्यमंत्री न बोलि कि गौं म सड़क बणौंण दा नाली बि बणै ज्यां। मुख्यमंत्री न सेना अर अर्द्धसैन्य बलों क शहीदु क नौं पर गौं म द्वार, स्कूल अर पंचैत भवनु का नौं शहीदु क नौं पर धरै ज्यां, गौं क शिलापटों पर शहीदु क नाम ल्यखणा कु बन्दुबस्त करै ज्यां। मुख्यमंत्री न अधिकारियों तैं निर्देश दीन कि गौं क विकास खुणि पन्दरौं वित्त आयोग बिटि मिलण वला रुप्यौं तैं सै ढ़ग से खरच करै ज्यां। मुख्यमंत्री न बोल क यु तय करै ज्यां कि गौं कु विकास खुणि ज्वा बि योजना बणै ज्यां वा योजना भ्वां मा बि दिख्येण चैंद। सबि पंचैतु म कम्प्यूटर अर इंटरनेटा बन्दोबस्त करै ज्यां।

कैबिनेट मंत्री सतपाल महाराजन बोलि कि गौं क तोक म रूजगार तैं बि बढावा दिये ज्यां अर पन्द्रहों वित्त आयोग बिटि मिल्यां रुप्यौं तैं गौं क विकास खुणि मानक तय कैकि खळाखळ काम करै ज्यां।

बैठकम मुख्य सचिव श्रीमती राधा रतूड़ी, अपर मुख्य सचिव आनन्द बर्द्धन, प्रमुख सचिव आर. के सुधांशु, सचिव पंचायतीराज चन्द्रेश यादव, अपर सचिव आलोक कुमार पाण्डेय, निदेशक पंचायतीराज निधि यादव, निदेशक सेतु डॉ. मनोज पंत बि छायीं।