मुख्यमंत्री की अध्यक्षता मा ह्वे पलायन निवारण आयोगा बैठक, पलायना कारण अर समाधान पर ह्वे छुंयीं

पाड़ बिटि हूंणू पलायन तैं रवक्णा वास्ता आज मुख्यमंत्री धामी की अध्यक्षता मा विधानसभा भराड़ीसैंण मा पलायन निवारण आयोग बैठक कायी। बैठकम पलायना कारण पर चर्चा अर वांकु समाधान खुणि क्य करे जै सकदु या पर विचार कायी।

बैठकमा मुख्यमंत्री न बोलि कि प्रदेस सरकार पलायना समस्या तैं लेकैकि गंभीर च अर पलायन तैं रवक्णा वास्ता योजनौं पर काम करणि च। प्रदेस सरकार गौं मा रुजगार अर विकासा काम खळाखळ करणि च। शिक्षा अर स्वास्थ्य सेवा मा काम करे जाणु च। ज्वानु तैं स्वरुजगार से ज्वड़णा कु काम करे जाणु च। उन्न बोलि पिछल तीन सालु मा स्वरुजगारा तोक मा खास ध्यान दिये ग्यायी।

मुख्यमंत्रिन बोलि साल 2025 तक उत्तराखण्ड तैं सबि प्रदेसु मा अग्वानया प्रदेस बणौंणा वास्ता सरकार काम करणि च।
पलायन निवारण आयोगा दियां सुझौ पर संबंधित विभाग कार्ययोजना बणाणु च।

मुख्यमंत्रिन बोलि कि प्रदेस सरकार न गौं क्षेत्रम पलायन तैं रवक्णा खुणि कै योजनौं तैं लागू कैन। जैमा गौं मा सबि तरोंक सुविधा अर विकासा काम हूंणा छन। ज्वानु तैं स्वरुजगार से ज्वड़े जाणु च। देस-विदेसा मा रैंण वला लोगु तैं गौं से ज्वड़णा कोसिस करे जाणि च। पलायन निवारण वास्ता भैर रैंण वला लोगु का सुझौ मिल्यां छन, जै पर काम करे जाणु च। बैठकम सदस्यु न पलायन निवारण खुणि विभागा मदतन अल्पकालिक, मध्यकालिक अर दीर्घकालिक योजनौं पर काम करणा बात बोलि।
ऐ मौका पर मुख्य सचिव श्रीमती राधा रतूड़ी, पलायन आयोगा उपाध्यक्ष एसएस नेगी अर अधिकारी छायीं।