पाड़ै अस्मिता पर अंगुळा उठौंण पोड़िग्ये भारी . . .

छरोळि क ठीक एक दिन बाद प्रेमचन्द अग्रवालन मुख्यमंत्री तैं अपणु इस्तीफा दे द्यायी।
बजटसत्रम प्रेमचन्द अग्रवाल न पाड़ा लोक्खु तैं गाळी दे छायीं। जैका बाद सर्या प्रदेसम प्रेमचन्द अग्रवाला खिलाप आंदोलन हूंणा छायीं अर लोग प्रेमचन्द अग्रवाला इस्तीफा मांग करणा छायीं।

अग्रवाल धामी सरकारम वित्त अर संसदीय कार्य जना विभाग तैं दख्यणा छायीं। उन्न त यु पैलि बार नीं च जब लोगुन प्रेमचन्द अग्रवाला इस्तीफा मांग कायी। यां से पैलि बि कै बार प्रेमचन्द विवादु मा रैन। प्रेमचन्द अग्रवाल पर मार-पिटै कु मुकदमा तक दर्ज ह्वे। साल 2023 मा एक वीडिया सोशल मीडिया मा खुब वायरल ह्वे, वीडियो मा प्रेमचन्द अग्रवाल सड़िकम एक मनखि तैं गाळी देकैकि अपणा सुरक्षा कर्मचारियों दगडि मिलिकैकि वे क़ि पिटणा छायीं।

विधानसभा पिछनेक् द्वार बिटि हूंयी भर्ति मामला प्रेमचन्द लगातार चर्चा मा छायीं।
विधानसभम पिछने द्वार बटि हूंयी भर्तिक् बाद बि ऊ पर इस्तीफा देंणा कु दवाब बण्यें ग्ये छायीं, प्रेमचन्द उबरि विधानसभा अध्यक्ष छायीं।
यांका बाद शहरी विकास विभागम 70 से जादा अधिकारी अर कर्मचारियौं कु बदली कु आदेश जै पर मुख्यमंत्रीन रोक लगै खुब चर्चा म रै। अपड़ा विभागा अप्सरु तैं जर्मन भ्यजणा कु मामलु बि खूब चर्चा मा रैन। प्रेमचन्द अधिकारियों अर कर्मचारियों की बदली करणा बाद जर्मन चलिग्येन। साल 2018 मा उन्न अपणा नौनु तैं जल संस्थानम नौकरि लगै दे यु मामलु बि खूब चर्चा मा रै।

यांका बाद बि प्रेमचन्द पर क्वीं कारवै नीं ह्वे अर ऊंकी हिकमत इतगा बढ़िग्ये कि उन्न सदन भितर पाड़ा रैवासियों तैं गाळी दे द्यायी।

यांका बाद पाड़ि लोगुन प्रेमचन्द इस्तीफा मांग कायी अर आखिरकार प्रेमचन्द अग्रवालन इस्तीफा दे द्यायी।

प्रेमचन्द अग्रवाल इस्तीफा पिछने जु खेल ख्यलणा छन वु बौत खतरनाक खेल च। प्रेमचन्द तैं यांकी जरा बि पिड़ा नीं च की उन्न कुछ गलत कायी। प्रेमचन्द अग्रवाला समर्थक अर खुद प्रेमचन्द यांकु सर्या दोष पाड़ा रैवासियों तैं हि देंणा छन।

प्रेमचन्द अपणि लगयीं आगिम अब पहाड़ बनाम मैदाना क्याणा लगै कि हौरि पिळचौंणा छन। अर मजादार कि यां कु सर्या ठीकरु बि पाड़ियौं का मुण्डम फवणा छन। कि मितैं अग्रवाल हूंणा कारण निसाण बणै जाणु च।

प्रेमचन्द अप्फु तैं पाक साफ साबित करणा लग्यां छन की मि राज्य आंदोलनकारी छौं मिन बि राज्य आंदोलन मा भाग ल्यायी। अर ब्वना छन कि म्यारु नौं क अगनै अग्रवाल लग्यूं च इल्लै सबि म्यारा खिलाप छन। इन्न मा सवाल यों च कि राज्य-आंदोलनकारी हूंण से ऊंका गुना माफ नीं करे जै सकदु। प्रेमचन्द तैं अब सफै देंण से क्य फैदा, यु सबि त पाड़ै अस्मिता पर अंगुळा उठौंण से पैलि स्वचण चैंद छायीं कि राज्य आंदोलनकारिया हूंणा मतबल यु कतै नीं हूंदू कि पाड़ियौं तैं गाळी दियें ज्यां।

आज अपणि सफै देंणा बजाय प्रेमचन्द सदनमा पैलि हि माफी मांगि लिंदा त आज ऊतैं रुण नीं प्वड़दु अर पाड़ियों की जिकुड़ि त इगता बढ़ि च की उ ऐ मामलु तैं बि भूलि जांदा।