हमरि लोक भाषा, हमरि पछ्याण अर हमरु गौरव च : मुख्यमंत्री धामी

देरादूण। मुख्यमंत्री धामीन आज उत्तराखण्ड भाषा संस्थान क बैठक कायी। बैठक मा उन्न गढ़वळि, कुमौंनि भाषा क दगड़ मा प्रदेसा औरि बोलि भाषा पंजाबी अर उर्दू साहित्य मा काम करण वलौं थैं उत्तराखण्ड साहित्य गौरव सम्मान देंणा क घोषणा कायी। उन्न हिन्दी मा महाकाव्य / खण्डकाव्य, कथा, साहित्य अर औरि गद्य विधाओं मा बि हर साल उत्तराखण्ड साहित्य गौरव सम्मान देंणा क घोषणा कायी। यांका दगड़ मा उन्न बोलि कि गढ़वळि, कुमौंनि अर जौनसारी लोक बोलि अर हिन्दी क 4 नै लेखकु थैं हर साल सम्मानित करयें जालु। मुख्यमंत्री न बोलि कि जु रचनाकार पैसौं क कमी क कारण अपड़ि किताबि थैं छप्पे नी सकणा छन, उंकी किताब थैं छपौंणा खूंणि उत्तराखण्ड भाषा संस्थान ऊंकी आर्थिक मदत कारलि।

मुख्यमंत्री न सबि जिलौं मा राष्ट्रीय अर अन्तर्राष्ट्रीय भाषा सम्मेलन उर्याणा कु निर्देश दीं अर बोलि कि भाषा संस्थान जैमा शोध पत्रौं कु वाचन, भाषा विचार, साहित्यिक शोभा जातरा, लोकभाषा कु सम्मेलन उर्यें ज्यां।

मुख्यमंत्री धामी न प्रदेसा सबि जनपदु क एक प्राथमिक स्कुळ मा डिजिटल/ ई पुस्तकालय ख्वलणा क निर्देश बि दीं। प्रदेस मा नेशलन बुक ट्रस्ट क दगड़ मा मिलिकि पुस्तक म्याळा उर्याणा अर म्याळों मा साहित्यिक संगोष्ठि उर्याणा क मंजूरि बि दियेग्यें।

मुख्यमंत्री न बोलि हमरि लोक भाषा अर बोलि हमरि पछ्याण अर हमरु गौरव च, अपड़ि बोलि अर संस्कृति थैं बचौंणा क सदनि कोसिस हूंण च।

बैठक मा मंत्री सुबोध उनियाल, सचिव विनोद प्रसाद रतूड़ी, अपर सचिव अर निदेशक उत्तराखण्ड भाषा संस्थान श्रीमती स्वाति भदौरिया, सदस्य डॉ. सुलेखा डंगवाल बि छायीं।