सदन मा विपक्षाकु हंगामा, वाकआउट

देरादूण। विधानसभा मा दूसर दिन आज विपक्ष न सदन मा प्रदेस क कानून व्यवस्था, बेरोजगारी अर मैंगेईं (महंगाई) पर सरकार क घेराबंदी कायी। प्रश्नकाळ शुरू हूंद हि सत्ता पर विपक्ष के बीच मा बेरोजगारी क गळत आंकड़ा दिंण पर घपरोळ ह्वै ग्यायी। सवाळ क जवाब नि मिळण पर विपक्ष कन सदन मा जमकैकि घपरोळ कैकि वाक आउट कैरि द्यायी।

विधान सभा मा अजै दिन विपक्ष न सदन मा कानून व्यवस्था थैं उठै। नेता विपक्ष प्रीतम सिंह न राज्य क काननू व्यवस्था के बारा मा नियम 370 क तहत चर्चा करणा क मांग कायी पर विधानसभा अध्यक्ष न ऐ प्रस्ताव थैं मंजूरि नि द्यायी।

प्रश्नकाळ शुरू हूंद हि कांग्रेस नेता निजामुद्दीन न सेवा नियोजन मंत्री से रोजगार पर सवाळ कायी। सवाळ पर काबीना मंत्री हरक सिंह रावत न ब्वाळ कि ऐ साळ हमन सात लाख लक्खु थैं रोजगार द्यायी। ईं बात पर कांग्रेस न सवाळ कायी कि जब पिछळि साळ 10 लाख मनखियों थैं अर ऐसु क साळ 7 लाख मनखियों थैं रोजगार द्यायी त ऐसु क साळ सबसे जादा रोजगार देंण क बात कनकैकि सै ह्वै सकद।

कांग्रेस न सरकार पर सदन मा गळत आंकड़ा देंणा क आरोप लग्यें पर ब्वाळ कि सरकार सदन थैं झूठ ब्वळणि च। कांग्रेस न मंत्री क खिलाफ विशेषाधिकार हनन क प्रस्ताव ल्याण का बात ब्वाळ। जै क बाद सदन मा कांग्रेस आर भाजपा नेताओं के बीच घपरोळ ह्वै। जैका बाद कांग्रेस न सदन बटि वॉकआउट कैरि द्यायी। कांग्रेस क वॉकआउट क बाद प्रश्न काळ नि ह्वै, प्रश्नप काळ मा द्वी हि सवाळ पूछेगीं।