‘ऑपरेशन सिंदूर’, जु हमर दगड़ि छेड़ कारलु, वैतैं हम छपोड़ि द्यूला

पहलगाम मा 22 अप्रैल खुणि हूयां आतंकी हमला कु जबाब 15 दिन बाद दिये ग्यायी। पहलगाम आतंकी हमला मा 26 निर्दोष लोगु की जान चलिग्ये। ऐ हमला बाद साफ छायीं की, ऐ आतंकी हमला कु पिछनै पाकिस्तान कु हत्थ छायीं। पहलगाम हमला म आंतकवादियों न नौं, धर्म पूछिकि 26 आदिम तैं मारिन।

यां कु जबाब भारतीय सेनान 7 मई, सुबेर डेढ़ बजि जब सर्या देस सियूँ छायीं पाकिस्तान अर पाक अधिकृत कश्मीरम आतंकियों का 9 ठिकाणों हम हमला कायी द्यायी। अर ऐ ऑपरेशन तैं नौं द्यायी ‘ऑपरेशन सिंदूर’। सिंदूर हमर देसम ब्यटुलौं की सुहाग निसाणि च अर पहलगाम मा आतंकिवादियों ब्यटुळों कु सुहाग पर हि हमला कै छायीं। इल्लै भारतीय सेनान ऐ ऑपरेशन तैं ‘ऑपरेशन सिंदूर’ नौं द्यायी।

भारतीय सेनान बहावलपुर जैश ए मोहम्मद, मुजफ्फराबाद अर कोटली लश्कर-ए-तैयबा अर हिजबुल मुजाहिदीन जन्न संगठन जख बिटि चलणा छायीं, तैं बरबाद कै द्यायी।

‘ऑपरेशन सिंदूरा’ जरिया भारतन यु बतै द्यायी कि अब आतंकियों तैं ऊंकी हि भाषम जबाब दिये जालु। आतंकियों तैं भारत कु यु जबाब च कि जु हमर दगड़ि छेड़ कारलु, वैतैं हम छपोड़ि द्यूला।

भारतीय वायुसेना न ऐ ऑपरेशनम मिसाइल कु इस्तमाल कायी अर बहावलपुर, मुजफ्फराबाद, कोटली, मुरीदके, बाघ अर पाकिस्तान पंजाबम जख आतंककियों का ठिकाणा छायीं वख हमला कैकि सर्या दुन्या तैं बतै द्यायी कि हम अपणा देसा रैवासियों सुरक्षा खुणि कुछ बि करणा खुणि त्यार छौ। यांका वास्ता हमतैं कैथें कुछ पुच्छणा जरुरत नीं च।

पहलगाम हमला बाद भारतन पाकिस्तान म आतंकियों कु ठिकाणा कख कख छन यांका बारम पता कायी अर तिन्या सेना न मिलकैकि ‘ऑपरेशन सिंदूर’ तैं पूरु कायी। ऐ ऑपरेशन मा सिरफ अर सिरफ आतंकवादा ठिकाणों पर हमला करै ग्यायी। सेनान कुल मिलैकि 24 मिसाइल चलैकि लश्कर ए तैयबा अर जैश एक मोहम्मद जन्ना संगठनु का ठिकाणों पर निसाण लगै। ऐ हमलम जैश कमांडर अर कतगै हौरि आतंकी टुणपट हूंणा खबर च।

ऑपरेशन पूरु हूंणा बाद भारतीय सेनान सोशल मीडिया ‘एक्स’ पर लेखि ‘जस्टिस इज सर्व्ड’ मतबल ‘न्याय पूरु ह्वेग्ये’, त रक्षा मंत्री राजनाथ सिंगन लेखि कि ‘भारत माता की जय’।

‘ऑपरेशन सिंदूर’ भारतीय सेना की तागत अर कूटनीतिक क्षमता बतौंणु च। भारतीय सेना साबित कै याली कि भारत अब संयम से जवाब देंणा दगड़ि अपणि रक्षा नीति पर काम करणु च।

ऐ ऑपरेशन बाद भारत अर पाकिस्तान बीच तकरार हौरि बढ़िग्ये। पर भारतन सिरफ अर सिरफ आतंकियों का ठिकाणु पर हि हमला कायी सर्या दुन्या तैं बतै द्यायी की हम लड़ै कतै नीं चांदा, पर अगर क्वीं बि हमतैं आँखा दिखालु त हम वैका आँखा फ्वड़णा खुणि त्यार छौ।