पुरणि पेंशन क मांग पर कर्मचारियों न मुख्यमंत्री आवास कायी कूच

देरादूण। उत्तराखण्ड मा पुरणि पेंशन दुबरा सुरू करणा क मांग तैं लेकैकि आज इत्वार खूंणि कर्मचारियों न राष्ट्रीय पुरणि पेंशन बहाली संयुक्त मोर्चा क निसाण (झण्डा) क ताळ मुख्यमंत्री आवास कूच कायी।

आज पैलि सबि कर्मचारी परेड गिरौंड मा जमा ह्वीं, जख बटि सबि नाराबाजी करदा एश्ले हॉल, दिलाराम बजार ह्वैकि मुख्यमंत्री आवास खूंणि पैटिन पर पुलिसन हाथीबड़कला मा बैरिकेडिंग लग्यें की ऊतैं रोकि द्यायी। जैका बाद पुरणि पेंशन दुबरा सुरू करणा मांग तैं लेकैकि मुख्यमंत्री आवास कूच करणा कर्मचारियों अर पुलिसा बीच मा खूब कचौर (बहस) ह्वैग्ये।

संयुक्त मोर्चा क प्रभारी विक्रम सिंह न बोलि कि सरकार कर्मचारियों क मांग तैं नीं मनण पर ऐंठी च, पर अब कर्मचारी पिछने हटणा खूंणि कतै त्यार नीं छन। उन्न बोलि कि पुरणि पेंशन दुबरा सुरू करणा क मांग मा सर्या प्रदेसा कर्मचारी एक छन पर सरकार न हमरि मांग पर अपणा कंदूड बन्द कर्या छन। उन्न बोलि कि हमरू घपरौल करणा कु क्वीं इरादा नीं च, हमरि मांग बस पुरणि पेंशन तैं दुबरा सुरु करणा क च, जु हमरू हक च।

उन्न बोलि कि उत्तराखण्ड क सरकरि कर्मचारियों न उत्तराखण्ड बणौंण म बड़ी भूमिका निभै पर प्रदेसा नेताओं न प्रदेस बणौंणा खूंणि कुछ बि नीं कायी। यांका बाद बि नेतौं क पेंशन खूंणि सरकार म बजट च पर जिन्दगि क 40 बरस नौकरि करणा क बाद बि कर्मचारियों क पेंशन खूंणि सरकार म पैंसा नीं च। उन्न उमेद जतै अर बोलि कि अगर उत्तराखण्ड म पुरणि पेंशन दुबरा सुरु होलि त उत्तराखण्ड भाजपा शासित पैलु प्रदेस होलु जख पुरणि पेंशन दुबरा सुरु होलि। कर्मचारियों न सरकार तैं खबरदार कायी अर बोलि कि अगर हमरि मांग नीं सूणें ग्यायी त कर्मचारी भवैष्य मा बडु आन्दोलन कारला।