अपणा काम करणा सगोर मा बदलाव कर्या अधिकारी : सतपाल महाराज

हरद्वार। जनपदा प्रभारी मंत्री अर प्रदेस क् कैबिनेट मंत्री सतपाल महाराजन जिला पंचैत कार्यालय सभागार हरद्वार म उर्यीं जिला पंचैत क बैठक म मुख्य अतिथि भाग ल्यायी। बैठक मा 2024-25 सा जिला पंचैत विकास योजना त्यार करणा, 44.5 करोड़ क बजट से क्षेत्र पंचैत तैं हौरि कटकुटु (सशक्तिकरण), सदस्यों क एक्पोजर विजिट, हाट बजारु क सफै, जिला पंचैत क जमीना पछ्याण कैकि वैंकु सै उपयोग करणा योजना त्यार करणा क बारा मा चर्चा ह्वै।

बैठक मा प्रभारी मंत्री सतपाल महाराजन जन प्रतिनिधियों क शिकैत बि संूणि, अर जिला स्तरीय अधिकारी तैं अपणा काम करणा सगोर (तरीका) म बदलाव करणा क खूंणि बोलि।

महाराजन एएमए जिला पंचायत तैं निर्देश दी कि जिला पंचैत सदस्यु तैं हौरि प्रदेसु क पंचैत तैं दिय्यौंणा क योजना त्यारि कर्यें ज्यां। उन्न एएमए जिला पंचैत तैं बोलि कि जनपद मा जिला पंचैत जमीन क पछ्याण कैकि उ पर गाड़ी खड़ी करणा जगा, बरात घर जन्ना काम करणा कु प्रस्ताव बण्यें ज्या।

बैठक सुरु हूंण से पैलि सिलक्यारा सुरूंग बटि भुरत्यौं तैं भैर निकलणा खूंणि केन्द्र सरकार मदत करणा खूंणि प्रधानमंत्री कु धन्यवाद प्रस्ताव पारित कर्यें ग्यें।

बैठक म जिला पंचायत अध्यक्ष राजेन्द्र सिंह (किरण चौधरी) विधायक रुड़की प्रदीप बत्रा परियोजना निदेशक डीआरडीए केएन तिवारी, अपर मुख्य अधिकारी जिला पंचायत ईबीसी छिम्वाल, मुख्य कृषि अधिकारी विजय देवराड़ी, डीएसटीओ नलिनी ध्यानी, डीपीआरओ अतुल प्रताप सिंह, उपाध्यक्ष जिला पंचायत अमित चौहान, जिलाध्यक्ष बीजेपी संदीप गोयल छायीं।