अब त सरकरि अफसर कैबिनेट मंत्री गणेश जोशी क बि नी सुंणणा छन

देरादूण। बल अब सरकरि अफसर गणेश जोशी कि बि नीं सुंणणा छन।

हाँ यु मामळु च उद्यान विभागा निदेशका जांच कु। जै थैं लेकैकि कैबिनेट मंत्री जोशीन सचिव वीवीआर सी पुरुषोत्तम थैं जांच खूंणि एक चिट्ठी लेखि। 14 सितम्बर 2022 क चिट्ठी मा गणेश जोशीन सचिव थैं उद्यान निदेशक हरविंदर सिंह बवेजा क खिलाफ वित्तीय अर प्रशासनिक घपरौळा तथ्यों क जांच कैकि 15 दिनमा कारवै कैकि रिपोर्ट देंणा खूंणि बोलि छायीं।

जैकि बाद 4 फरवरी 2023 खूंणि कैबिनेट मंत्री न दुबर सचिव थैं चिट्ठी लेखि अर बोलि कि अबि तक ऐ मामळु मा क्वीं कारवै नी ह्वै, अर न हि क्वीं रिपोर्ट दियेंग्यें या बौत झिरौण (दुखःदायी) वळि बात च।

यांका बाद बि मंत्री तैं आजै तारिख तक क्वीं जबाव नी मिळि। या से साफ ह्वै कि सतपाल महाराज ठीक ब्वना छन कि अफसर कैकि नी सुंणणा छन। महाराज लगातार या मांग करणा छन कि मंत्रियौं तैं अफसरु एसीआर ल्यखणा खूंणि दियें ज्या। महाराज त महाराज अब त सरकरि अफसर कैबिनेट मंत्री गणेश जोशी क बि नी सुंणणा छन।