अब सतपुली ‘खैरासैंण’ मा भि ह्वैली एडवेंचर टूरिज्म पर्यटन गतिविधि

नयार मा बारमास ह्वला साहसिक खेल

मुख्यमंत्री त्रिवेन्द्र सिंह रावत क गौ एडवेंचर टूरिज्म का केंद्र बणळु। सरकार 13 डिस्ट्रिक्ट 13 डेस्टीनेशन योजना मा खैरासैंण थैं साहसिक पर्यटन खुणि विकसित कारळी। खैरासैंण मा साहसिक गतिविधियां विकसित हूंण से वखका युवाओं थैं अपड़ू रोजगार करणा कू मौका मिळालु। वखि वख वाटर स्पोर्ट्स मा देश अर विदेश क खिलाड़ी त्यार करै जाळा।

पौड़ी जिळा मा सतपुळी से पांच किळोमीटर अगनै खैरासैंण गौ च, जै गांव मा मुख्यमंत्री त्रिवेद्र सिंह रावतन अणडू बाळ जीवन बितैैई छायी। गांव क किनारा फर नयार गदानु च। गौ मा साहसिक खेळों सम्भावना थै देखिक सरकार 13 डिस्ट्रिक 13 नए डेस्टीनेशन योजना मा खैरासैंण थैं विकसित करणी च।

अब सतपुळी क नयार मा पाणी का खेळ अर वख का पहाडु मा माउंटनियरिंग , पैरा ग्लाइडिंग, बंजी जंपिंग, ट्रेकिंग जना खेळ ह्वाळा ।

रूड़ियोें मा नयार मा पाणी कम ह्वै जांदा जै खुणि नयार मा 30 चेक डेम बणाणे जाळा। जै से पाणी मा खेळ सर्या साळ चलणा राळा।

नयार गदन मा क्याकिंग, केनोईग जन पाणी का खेळ खुणि सै जगह च। यख एक ही जगह मा साहसिक खेळ हुंण से पौड़ी जिळा का नौजवान नौंनो थैं रोजगार मिळळु। दगड़ मा ऊथैं देश अर विदेशी स्तर क पाणी क खेळ जन खेळु मा भाग लिणा कु भि मौक मिलळु।

हमन पिछळा तिन साळु मा कोशिश कायी कि प्रसिद्ध जगह तक समट्यू पर्यटन थैं दूसरि जगह मा ळिजाये जावा। हमन प्रत्येक जिळा मा नै पर्यटन स्थळ विकसिक करणा कू काम कायी। जै मा सफळतला मिळि। खैरासैंण एडवेंचर टूरिज्य का केन्द्र बणणु च।

त्रिवेन्द्र सिंह रावत, मुख्यमंत्री