अब प्रदेस मा उपचुनाव अर निकाय चुनौ क बारी, भाजपा न कायी तय्यरि सुरु

देरादूण। उत्तराखण्ड राज्य मा लोकसभा चुनौ खतम ह्वेग्येन अर अर प्रदेस मा उपचुनाव अर निकाय चुनौ क बारी च जै खूणि भाजपा न अबि बिटि तय्यरि सुरु कै याली।

बतै दियां अबि प्रदेस म विधानसभा क द्वी सीट बदरीनाथ अर मंगलौर विधानसभा सीट खाली छन। बदरीनाथ सीट कांग्रेस विधायक राजेन्द्र भण्डारी क कांग्रेस छोड़िकि भाजपा मा सालिम हूंणा कारण या सीट खाली ह्वे त मंगलौर सीट का विधायक सरवत करीम अंसारी क म्वरण से सीट खाली ह्वे।

भाजपा प्रदेस महामंत्री आदित्य कोठारी न बतै कि बदरीनाथ अर मंगलौर विधानसभा उपचुनौ क खूणि एक-द्वी दिना भितर चुनौ प्रभारी अर चुनौ संयोजक घोषणा करै जाली। उन्न बोल कि औंणा वला निकाय चुनौ तैं देखिकि स्थानीय प्रकोष्ठों क बैठक बुलै ग्यायी अर बौत जल्दी भाजपा स्थानीय प्रकोष्ठ जिलों मा जैकैकि नगर निगम, नगर पालिका अर नगर पंचायत क प्रतिनिधियों कु पैनल तय करै जालु अर जितण वला उमेदवार तैं प्रत्याशी बण्यें जालु।