अब बारी जनतै च

UK dinmaan

उत्तराखण्डम शुक्रवार भोळ मतदान च। उत्तराखण्डा पच्याँ लोकसभा सीटु मा 83.37 लाख मतदाता छन। जु 55 प्रत्याशी कु राजनीतिक भवैष्य कु फैसला काराला।

उत्तराखण्ड मा उन्न त मुकाबला भाजपा अर कांग्रेसा बीच मा हि च। हरद्वार सीट म तीन मुख्यमंत्रियों क साख दाव पर लग्यीं च। हरद्वार बिटि भाजपा बिटि पैल्यक मुख्यमंत्री त्रिवेन्द्र सिंह रावत त कांग्रेस बिटि विरेन्द्र सिंह रावत मैदान मा छन। पर हरद्वार लोकसभा सीट मा कांग्रेसा तरफा बिटि त असल लडै़ कांग्रेसा पैल्यक मुख्यमंत्री हरीश रावत हि लड़णा छन अर वु बि भाजपा क पैल्यक द्वी मुख्यमंत्रियों निशंक अर त्रिवेन्द्रा समणि।

हां टिरी लोकसभा सीट म मुकाबला मा त्रिकोणीय दिख्येणु च यख मुकाबला म भाजपा, कांग्रेस अर निर्दलीय बॉबी पंवार छन। यख भाजपा की सांसद माला राज्य लक्ष्मी शाह अर कांग्रेस बिटि पैल्यक विधायक जोत सिंह गुनसोला मैदान मा छन यांका बाद यीं सीट मा सबसे जादा छ्वीं बॉबी पंवार हूणि छन। बॉबी पंवार दगड़ि ज्वान छन अर बॉबी पंवार अबकदा टिरी बिटि इतिहास बणौंणा दावा करणा छन।

अल्मोड़ा लोकसभा सीट मा द्वी पुरणा खिल्वार हि मैदान मा छन कांग्रेसा प्रदीप टम्टा त भाजपा बिटि अजय टम्टा मैदान मा छन।

वखि नैनीताल ऊधमसिंह लोकसभा सीट म भाजपा क अजय भट्ट र कांग्रेस प्रकाश जोशी क बीच म च। अजय भट्ट दूसर दा त प्रकाश जोशी तैं जितणा कु पूरु भरोसु च।

प्रदेस मा जै सीट क बारा मा सबसे जादा छ्वी बत्था हूणि छन वा च पौड़ी लोकसभा सीट। गढ़वाल लोकसभा सीट म भाजपा क अनिल बलूनी त कांग्रेस बिटि गणेश गोदियाल मैदान मा छन।

ब्याली तक ब्वलें जाणु छायीं कि पौड़ी बिटि कांग्रेस मा क्वीं उमेदवार नीं च, पर जन्नि कांग्रेस बिटि गणेश गोदियाल नौं घोषणा ह्वे उन्नि पौड़ी सीट हि ना बल सर्या कांग्रेस मा नै जान ऐग्यें। अर भाजपा तैं पौड़ी मा प्रधानमंत्री मोदी, गृहमंत्री अमित शाह, राजनाथ सिंह त उत्तरप्रदेशा मुख्यमंत्री तैं बुलौंण प्वोड़िग्ये। इतगै न भाजपा प्रदेश अध्यक्ष त मंच मा रुणा बिठैग्येन अर बलूनी तैं जितौंणा खूणि अपील करण छन।

अब कु जितद अर कु हरद, ऐ बारा मा अबि त कुछ नीं ब्वलें जै सकदु, अब त टिहरी गढ़वाल-15,77,664 मतदाता, गढ़वाल-13,69,388 मतदाता, हरिद्वार-20,35,726 मतदाता, नैनीताल-ऊधम सिंह नगर-20,15,809 मतदाता, अल्मोड़ा-13,39,327 मतदाताओं क बारी च
वु जितौन्दन अर कथैं हरौन्दन।