निकाय चुनौः ह्यूंदा मैना सियासी गरमैस, उम्मेदवारु तैं जड्डु मा बि खुब पस्यौं (पसीना) बगौंण प्वाड़लु

देरादूण नगर निगम म ऐसु साल चुनौ मा बि खूब घमाचूर (घमासान) हूंणा उमेद च। किलैकि मेयर पदा वास्ता एक द्वी न बल दस उम्मेदवार मैदान मा त 10 वार्डु मा पार्षद पदा वास्ता 384 उम्मेदवार मैदान मा बच्चां छन। देरादूणा 100 वार्डौं मा उतर्या उम्मेदवार अर देरादूणा मेयर प्रत्याशी कु फैसला साल लाख से जादा मतदाता कराला।

बतै दियां कि या से पैलि साल द्वी हजार अठ्ठारम (2018) देरादूणा 100 वाडु मा चुनौ ह्वे छायीं अर या से पैलि देरादूण मा 60 वार्ड छायीं। नगर निगम से ल्यां गौं तैं देरादूण नगर निगम मा सामिल कैकि देरादूण नगर निगम तैं 100 वाडु कु करे ग्यायी। इल्लै नगर निगम मा मतदातौं की संख्या बि बड़ी ग्ये।

नाम वापिस बाद या बात साफ ह्वेग्ये कि देरादूण मा मेयर पदा वास्ता 10 उम्मेदवार मैदान मा छन। जैमा कांग्रेस, भाजपा, आम आदमी पार्टी, यूकेडी व निर्दलीय कुल 10 उम्मेदवार मैदान मा छन।

एतगा साफ च कि देरादूण मेयर पदा चुनावी लड़े कांग्रेस अर भाजपा के बीच मा हि होलि। हां निर्दलीय अर हौरि पार्टियौं का उम्मेदवार सिरफ अर सिरफ द्वीया पार्टी कु गणित तैं जरूर बिगाड़ि सकदन बस, हौरि कुछ नी कै सकदन।

दूसर तरफा बात करदो त साल द्वी हजार अठ्ठारक (2018) चुनौ मा नगर निगम देरादूण मेयर पदा वास्ता 15 त पार्षद पदा वास्ता 451 उम्मेदवार मैदान मा छायीं। अब नामांकन पत्रौं की जांच अर नाम वापिस लिंणा बाद साफ ह्वेग्ये कि ऐसु साल नगर निगम चुनौ मा मेयर वास्ता 10 त पार्षद पदा वास्ता 384 उम्मेदवार मैदान मा छन।

कुल मिलैकि पिछल चुनौ क तरौं ऐसु 2025 नगर निगम चुनौ मा बि घमाचूर हूंण पूरी उमेेद च। किलैकि एक तरफां परिसीमन अर आरक्षणा बाद राजनीतिक दलु अर ऊंका उम्मेदवारु गणित बिगड़यू च, त टिकट नी मिलण से नराज मैदान मा छन जु पार्टी उम्मेदवारु जोड़-घटौं तैं खराब करणा छन।

त मेयर पदा वास्ता मेयर उम्मेदवार तैं देरादूणा दूर-दूर कूणा-कूणा अर सैरू की गली-गली मा हत्थ जोड़िकि बोट मंगण प्वाड़ला। इन्न मा साफ च कि पूस अर अद्दा माघा मैना 23 जनवरी तक प्रदेस सियासी गरमैस त राली हि, दगड़ा-दगड़ि पाषर्द अर मेयरा उम्मेदवारू तैं जड्डु मा बि खुब पस्यौं (पसीना) बगौंण प्वाड़लु।